طالبان نینگ سرحد لر، قوم لر و قبیله لر وزیری نورالله نوری، مخالف لر بیلن گپله شیشگه تیار ایکن لیگی باره سیده گی آلدینگی موضع سیدن قیتیب، مذاکره وقتی توگه گنینی اعلان قیلدی. او، ینگی بیاناتی ده، مخالف جریان لرنینگ «مذاکره گه ارزیمَسلیک» لرینی ایتگن.
بو موضع نینگ اۉزگریشی، جناب نوری نینگ بیر هفته دن کمراق آلدین، یعنی ۸ میزان ده، کوچی لرنینگ اولوغلری بیلن اوچره شوویده، مخالف لردن قوراللی کوره شنی ترک ایتیب، افغانستان گه قَیتیب کیلیش لرینی سۉره گنیدین سۉنگ یوز بېردی. او، اوشه ییغیلیش ده: «افغانستان همه افغان لرنینگ اویی. بیز تفاهم اهلی میز و سیزلر بیلن گپله شه میز» دېگن اېدی.
لیکن حاضر، غزنی ولایتی نینگ جاغوری ولسوالی سی اولوغلری و عالم لری بیلن بولیب اوتگن بیر ییغیلیش ده، اۉز لحنینی بوتونلی اۉزگرتیریب: «مذاکره لر وقتی اېمس، مذاکره و تفاهم گه احتیاج یۉق» دېب ایتدی. او، مخالف لردن مذاکره لرنینگ قیته باشلنیشینی کوتمَسلیک لرینی سۉره دی.
جناب نوری، هبت الله آخندزاده رهبرلیگیده گی «اسلامی نظام» حاکمیتیگه تأکید قیلیب، مخالف لردن حاضرگی نظام اوچون قنده ی طرحه یا بدیل لری بارلیگینی سۉره دی. او، «اگر سیز اسلامی نظام ایسته
سنگیز، سیزنینگ نسخه و طرحه نگیز نېمه؟» دېدی.
طالبان نینگ بو مقامی، شونینگدیک، مخالف لرنی تشقی مملکت لرنینگ استخباراتی سازمان لریدن مالی یاردم آلیشده عیبله دی و اولرنینگ امنیت نی بوزیشگه قادر بولمه سلیکلرینی آگاهلنتیردی. او، طالبان حکومتی نینگ مملکت بویلب امنیت نی تأمینله گنینی ادعا قیلدی.
طالبان کابینه سی نینگ بیر وزیری تامانیدن بو آچیقچه کیینگه چیگینیش، بو گروه نینگ سیاسی و حربی مخالف لریگه نسبتاً روشی حقیده گی گمان لرنی کوچه یتیره دی. مخالف لر، طالبان حکومتی نی نامشروع دېب بیلیب، اولرنی اوروش یولی بیلن قدرت نی تارتیب آلیش و وطنداش لر، خصوصاً خاتین-قیزلرنینگ اساسی حقوق لرینی پامال قیلیشده عیبله ماقده لر.
منبع: Zarin TV
🌐
