افغانستان آزادلیک جبهه سی، کوچلری کاپیسا ولایتی نینگ حصه اول کوهستان ولسواللیگیده طالبان نینگ بیر پاسگاهی نی راکتی هجومگه هدف قرار بېرگنینی اعلان قیلدی. بو جبهه ادعا قیلیشیچه، بو هجومده کمیده اوچ طالبان جنگچیسی اۉلدیریلیب و باشقه ایکّی تنی یره لنگن.
بو جبهه چهارشنبه کونی ترقتگن بیر خبرنامه ده، اوشبو هجوم کیچه سی ساعت ۲ اطرافیده پوزه خم زرگر منطقه سیده یوز بېرگنینی یازگن. آزادلیک جبهه سی تأکیدله گنکه، بو هجومده اونینگ کوچلریگه هیچ قنده‌ی زیان ییتمه‌گن.
طالبانگه قرشی بو جریان شونینگدیک ایتگنکه، محلی طالبان کوچلری سونگگی پیتلرده خم زرگر منطقه سیده «اهالی نی آزار و اذیت قیلیش» نی کوچه یتیریب و بو هجوم شونینگ جوابی صفتیده عملگه آشیریلگن. بو ادعا لر مستقل روشده تصدیقلش ممکن ایمس.
آزادلیک جبهه سی تامانیدن ترقه تیلگن ویدیو ده، پارتلش لحظه سی، آتیشمه آوازی و کیچه نینگ قارانغولیگیده آتش شعله لری نینگ کۉتریلیشی کۉرینگن. بو ویدیو نینگ صحتی هم مستقل روشده تصدیقلنگن ایمس.
اوشبو سیاسی-حربی جریان سونگگی هفته لرده تورلی ولایتلرده طالبان موضع لریگه قرشی هجوملرینی کوپه یتیرگن. افغانستان اینترنشنل نینگ معلوماتیگه کۉره، آزادلیک جبهه سی چهارشنبه ایرته لب بدخشان ولایتی مرکزی فیض آباد شهریده یوز بېرگن پارتلش مسؤلیتینی هم بوینیگه آلگن.
بو جبهه فیض آبادده طالبان اعضا لری نی تاشووچی بیر هایلکس موترگه قرشی هدفلی عملیاتده، اوشبو گروه نینگ تۉرت عضوی نی اۉلدیرگنینی معلوم قیلگن. شونده‌ی بیر پیتده، آزادلیک جبهه سی نینگ سوزلاوچیسی نصرت الله فاتح، بو جبهه کوچلری نینگ نورستان ولایتی کامدېش ولسواللیگیده طالبان بیلن توقنه شگنینی هم تصدیقله‌گن.
منبع: افغانستان اینترنشنل
🌐
