پاکستان باش وزیری نینگ سیاسی مصلحتچیسی رنا ثناءالله نینگ ایتیشیچه، اسلام آباد دلیل لرگه اساسلنگن حالده افغانستان توپراغی ایچیده «محدود مقیاسده» عملیاتلر عملگه آشیریبدی. او چهارشنبه کونی، ۱۵ میزان ده، بیر خبر کنفرانسیده ایتگنکه، پاکستان نینگ طالبان حکومتی دن یالغیز ایسته‌گی، افغانستان توپراغیدن پاکستانگه قرشی فایده لنیشگه رخصت بېر مسلیک دیر.
ثناءالله اسلام آبادده گی بو خبر کنفرانسیده تأکیدله‌دی: «بو ایستکدن تشقری بیر کلمه هم یوق.» او ایتگنکه، پاکستان افغانستان توپراغیده پاکستانده تروریستی هجوملر اوچون فایده لنیله دیگن مرکز لرنی «خنثی» قیلیش حقیگه اېگه و بو حقنی اۉزی اوچون محفوظ سقلیدی.
اوشبو پاکستان مقامی قۉشیمچه قیلدی که، اونینگ مملکتی حاضرگچه اعتبارلی دلیل لرگه اساسلنیب، بو ساحه ده محدود عملیاتلر عملگه آشیریبدی. او بو عملیاتلرنینگ ماهیتی، زمانی یاکه مکانی حقیده کوپراق جزئیات بېرگن ایمس.
ثناءالله نینگ ایتیشیچه، سعودی عربستان، قطر، چین و ترکیه کبی مملکتلر طالبان حکومتینی افغانستان قلمروی پاکستانده تروریستی هجوملر اوچون ایشلتیلمسلیگیگه قاندریش اوچون کوپ تلاش قیلگنلر، لیکن اونینگ سۉزلریگه کۉره، طالبان اداره سی هلی هم اسلام آبادگه بونده‌ی بیر تضمین بېرگن ایمس.
پاکستان باش وزیری نینگ مصلحتچیسی، مملکتی نینگ تروریزم گه قرشی کوره ش سیاستی نی افغانستان، طالبان و پاکستان تحریک طالبان (TTP) بیلن علاقه ده اوتگن تۉرت دهه لیک تجربه گه اساسلنگن دیب بیلیب و بو حقده پاکستانده ملی اجماع موجود لیگینی ایتگن.
اسلام آباد و کابل آره سیده گی تنشلر ۱۴۰۰ نچی ییلده طالبان نینگ ینه قدرت گه کیلگنیدن سۉنگ، خصوصاً پاکستان تحریک طالبان نینگ فعالیتلری سببلی، آشیب بارگن. پاکستان افغانستان طالبانینی TTP رهبرلری و جنگچی لریگه پناه بېریش بیلن عیبلیدی، بو عیبلاونی طالبان هر دایم رد قیلیب کیلگن.
منبع: اسلام آبادده گی خبر کنفرانسی
🌐
