افغانستان ملی مقاومت جبهه سی نینگ عمومی قوماندانی قدم شاه شهیم نینگ ایتیشیچه، طالبانگه قرشی قوراللی کوره ش گه باشقه سیاسی و حربی جریانلرنینگ قۉشیلیشی، اوروش نینگ کینگه‌یشی اوچون امیدلرنی آشیرگن. او افغانستان اینترنشنل بیلن بیر خاص صحبتده ایتگنکه، بو جریانلر طالبان بیلن مقابله قیلیش نینگ یالغیز یولی قوراللی مقاومت دېگن نتیجه گه کیلگنلر.
جناب شهیم اهالی نینگ آگاهیلیگی آرتیشی و «طالبان چهره سی نینگ فاش بولیشی»نی بو جبهه نینگ امیدواریلیگی نینگ باشقه دلیللریدن دیب اتَدی. اونینگ ایتیشیچه، طالبان آره سیده گی ایچکی اختلافلر و اهالی نینگ مقاومت کوچلری بیلن همکارلیگی هم قوراللی فعالیتلرنینگ کینگه‌یشی اوچون زمینه یره‌تگن.
ملی مقاومت جبهه سی نینگ عمومی قوماندانی ادعا قیلیشیچه، بو جبهه نینگ کوچلری بغلان، پنجشیر، سمنگان، نورستان و لغمان ولایتلری نینگ بعضی قسم لریده فزیکی حضور گه اېگه و بعضی منطقه لرده محلی اهالی نینگ حمایتیگه هم اېگه دیرلر. او مشخص اوله راق بدخشان حقیده ادعا قیلدی که بو ولایت اهالیسی نینگ ۹۵ فایزی طالباندن یوز اۉگیرگن.
او قۉشیمچه قیلدی که، بدخشانده گی محلی طالبان کوچلری نینگ تخمیناً ۸۵ فایزی هم بو گروه دن اوزاقلشگن و طالبان مجبور بولگن که باشقه ولایتلردن تخمیناً تۉرت مینگ جنگچی کوچنی بدخشان گه یوبارسین. شهیم ایتگنکه، بو کوچلر کوپراق فیض آباد و چېگره منطقه لریده جایلشگن.
قدم شاه شهیم مقاومت جبهه سی نینگ حربی تجهیزاتلری حقیده ایتگنکه، اولرنینگ کوچلری کلاشنیکوف کبی متعارف قوراللرگه اېگه و سونگگی پیتلرده بیر قطار اوچووچیسیز اوچاقلرنی هم قولگه کیریتگنلر. او طالبان نینگ اوچووچیسیز اوچاقلردن فایده لنیشینی «جوده ابتدایی» دیب توصیفله‌دی و «چیت ایللیک تروریستلر» بو ساحه ده طالبانگه یاردم بېره یاتگنینی ادعا قیلدی.
مقاومت جبهه سی نینگ بو قوماندانی شونینگدیک افغانستان آزادلیک جبهه سی نینگ فعالیتلرینی تقدیرلب و ایتگنکه، بو جبهه بدخشان نینگ زیباک ولسواللیگیده طالبانگه قرشی هجوملر اویوشتیرگن. او تأکیدله‌دی که حاضرده کوپلب گروهلر و اهالی طالبان بیلن سیاسی ییچیم ممکن ایمس دېگن توشونچه گه ییتگن.
منبع: افغانستان اینترنشنل
🌐
