هرات نینگ اولیملی یېر قیمیرلشیدن اوچ ییل اوتگنیدن سۉنگ، بو ولایت نینگ زنده جان ولسواللیگیده تیریک قالگنلر هلی هم اۉز حیاتلرینی قیته قوریش اوچون کوپلب قیینچیلیکلر بیلن روپه رو دیرلر. یاردم بېرووچی اداره لرنینگ گزارشلری کۉرسه تیشیچه، اویلرنی قیته قوریش دوام ایته یاتگنیگه قره مسدن، ایشسیزلیک، سوو کمچیلیگی، ییترلی بولمه‌گن صحی خدماتلر، و روحی آسیب لر کبی معما لر هلی هم موجود.
هرات نینگ اولیملی یېر قیمیرلشی ۱۴۰۲ نچی ییل ۱۵ میزان ده (۲۰۲۳ نچی ییل ۷ اکتوبر) یوز بېردی. بو فاجعه نینگ حماس نینگ اسرائیلگه هجومی بیلن بیر پیتده یوز بېریشی، رسانه لر و خلق ارا یاردم لرنینگ توجهی کوپراق اورته شرقده گی اوروشگه قره تیلیشیگه و هرات فاجعه سی نینگ سایه ده قالیشیگه سبب بولدی.
جهان صحت تشکیلاتی نینگ آمارلریگه کۉره، هراتده ۱۴۰۲ نچی ییل ۱۵ میزان دن ۲۳ میزان گچه یوز بېرگن پی در پی یېر قیمیرلشلر نتیجه سیده وفات ایتگنلرنینگ عمومی سانی ۱۴۸۲ کیشیگه ییتدی. شونینگدیک، خلق ارا اداره لرنینگ مشترک بهاله شی آسیب کورگنلر سانی نی ۲۷۵ مینگدن آرتیق و بوتونله‌ی ویران بولگن اویلر سانی نی ۱۳،۵۰۰ دن کوپراق تخمین قیلگن.
جهان بانکی، اروپا اتفاقی، بیرلشگن ملتلر تشکیلاتی و آسیا ترقیات بانکی تامانیدن عملگه آشیریلگن بو بهاله ش، قیته تیکلش و بازسازی اوچون کیره کلی هزینه نی تخمیناً ۴۰۳ میلیون دالر دیب تخمین قیلگن. بو گزارشده، مسکن زلزله دن تیریک قالگنلرنینگ اینگ کتّه ضرورتی صفتیده معرفی ایتیلگن.
اوچ ییل اوتگنیدن سۉنگ، کوپلب عایله لر هلی هم موقت یاکه یریم قوریلگن اویلرده یشه ماقده لر و خلق ارا یاردم لرنینگ کمه‌ییشی بیلن، اولرنینگ کیله جگی نامعلوم دیر. مدنی فعاللرنینگ ایتیشیچه، فزیکی ضرورتلرگه قۉشیمچه، تیریک قالگنلر، خصوصاً عیاللر و باله لر اوچون روحی و اجتماعی حمایتلر یوقاری اهمیت گه اېگه که اونگه آز توجه قیلینگن.
ساغلم ایچیم‌لیک سووی کمچیلیگی معما سی که زلزله دن آلدین هم موجود اېدی، زیربنا لرنینگ ویران بولیشی بیلن شدتله نیب و اهالینی جدی صحی معما لر بیلن یوزمه یوز قیلگن. محلی اهالی طالبان حکومتی و خلق ارا جامعه دن زلزله کورگن منطقه لرنی تولیق قیته قوریش اوچون اۉز تعهد لرینی عملگه آشیریشلرینی ایسته ماقده لر.
منبع: یاردم بېرووچی اداره لرنینگ گزارشلری
🌐
