د هرات له مرګونې زلزلې درې کاله وروسته، د دغه ولایت په زنده جان ولسوالۍ کې ژوندي پاتې شوي کسان لا هم د خپل ژوند د بیارغونې لپاره له ګڼو ننګونو سره مخ دي. د مرستندویه ادارو راپورونه ښيي چې د کورونو د بیارغونې له دوام سره سره، د بېکارۍ، د اوبو کمښت، د روغتیايي خدمتونو نشتوالی او رواني زیانونو په څېر ستونزې لا هم پر ځای دي.
د هرات مرګونې زلزله د ۱۴۰۲ کال د میزان په ۱۵مه (د ۲۰۲۳ کال د اکتوبر په ۷مه) وشوه. له اسراییلو سره د حماس له برید سره د دې ناورین همغږي د دې لامل شوه چې د نړیوالو رسنیو پام او مرستې په منځني ختیځ کې جګړې ته واوړي او د هرات ناورین په سیوري کې پاتې شي.
د روغتیا نړیوال سازمان د شمېرو له مخې، په هرات کې د ۱۴۰۲ کال د میزان له ۱۵مې تر ۲۳مې پورې د پرله پسې زلزلو له امله د مړو شویو کسانو ټولیز شمېر ۱۴۸۲ تنو ته ورسېد. دغه راز، د نړیوالو بنسټونو یوې ګډې ارزونې د اغېزمنو شویو کسانو شمېر تر ۲۷۵ زرو ډېر او د بشپړو ویجاړو شویو کورونو شمېر تر ۱۳،۵۰۰ ډېر اټکل کړی دی.
دغې ارزونې چې د نړیوال بانک، اروپايي ټولنې، ملګرو ملتونو او د اسیا پراختیايي بانک له خوا ترسره شوې، د بیارغونې او رغونې لګښت شاوخوا ۴۰۳ میلیونه ډالره اټکل کړی دی. په راپور کې، کور جوړونه د زلزله ځپلو تر ټولو لویه اړتیا بلل شوې ده.
درې کاله وروسته، ډیری کورنۍ لاهم په موقتي یا نیمه جوړو کورونو کې ژوند کوي، او د نړیوالو مرستو په کمیدو سره، د دوی راتلونکې ناڅرګنده ده. مدني فعالان وايي چې د فزیکي اړتیاوو ترڅنګ، د ژوندي پاتې شویو، په ځانګړې توګه د ښځو او ماشومانو لپاره رواني او ټولنیز ملاتړ خورا مهم دی، چې لږ پام ورته شوی دی.
د څښاک د پاکو اوبو د کمښت ستونزه، چې له زلزلې مخکې هم موجوده وه، د زیربناوو له ویجاړیدو وروسته نوره هم سخته شوې او خلک یې له جدي روغتیايي ستونزو سره مخ کړي دي. ځایی خلک د طالبانو له حکومت او نړیوالې ټولنې غواړي چې د زلزله ځپلو سیمو د بشپړې بیارغونې لپاره خپلې ژمنې پوره کړي.
سرچینه: د مرستندویه ادارو راپورونه
🌐
