ننگرهار ولایتی ده محلی منبعلر نینگ معلوم قیلیشیچه، بو ولایت نینگ بهسود تومنیده بیر کیشی قوراللی اۉغریلر تامانیدن اۉلدیریلگن. آمو تلویزیونی نینگ گزارشیگه کۉره، بو حادثه بۉگوندن پنجشنبه، ۱۷ میزان کونی، بهسود تومنی نینگ دامان منطقه‌سیده یوز بېرگن.
منبعلر گه کۉره، قوراللی اۉغریلر او کیشی نینگ دۉکانیگه هجوم قیلیب و اونی اۉلدیرگندن سۉنگ، موترسیکلینی هم اۉزلری بیلن آلیب کېتگنلر. آمو تلویزیونی نینگ باشقه بیر گزارشی ده کېلتیریلیشیچه، اۉغریلر ۱۲۵۰۰ پاکستان کلداری، موبایل تیلفونی و او نینگ کیملیک کارتی نی هم اۉغیرله‌گنلر. اۉلدیریلگن کیشی نینگ کیملیگی حلی گچه رسمی روشده اعلان قیلینمه‌گن.
حاضرگچه طالبان حکومتی نینگ ننگرهار ده گی محلی مسئوللری بو حادثه حقیده فکر بیلدیرمه‌گنلر و بو قتل نینگ اصلی انگیزه‌سی هم انیقلنمه‌گن. مقتول نینگ عایله‌سیگه یقین منبعلر، اولرنینگ هیچ کیم بیلن شخصی دشمنلیگی یۉق لیگینی ایتگنلر.
بو قتل ننگرهار ولایتی ده خوفسیزلیک وضعیتی نینگ یامانلشیشی و جنایی جرم لر نینگ کۉپه‌ییشی دوامیده یوز بېرماقده. سۉنگگی آیلرده، بو ولایت نینگ تورلی منطقه‌لریده کۉپ سانلی مرموز قتللر، قوراللی اۉغریلیکلر و آدم اۉغیرلش حادثه‌لری گزارش بېریلگن کی، بو ایسه اهالی نینگ جدی تشویشیگه سبب بۉلگن.
محلی اهالی طالبان حکومتی دن خوفسیزلیک نی تأمینلش و جنایتکار گروهلر نینگ فعالیتی نی تۉخته تیش اوچون جدی تدبیرلر کۉریشنی طلب قیلماقده‌لر. خوفسیزلیک گزمه‌لری نینگ کۉپه یتیریلیشی و بونده‌ی حادثه‌لر نینگ عامللری نی قولگه آلیش، خلق نینگ اساسی ایستکلریدن دیر.
طالبان حکومتی ۲۰۲۱ نچی ییل نینگ اگست آیی ده قدرت نی قولگه کیریتگندن سۉنگ مملکت بۉیلب خوفسیزلیک نی تأمینلشگه وعده بېرگن بولسه ده، لیکن کۉپچیلیک بویوک ولایتلر، اینیقسه ننگرهار ده جنایی جرم لر هنوز هم بیر بویوک چالش بۉلیب قالماقده. بو وضعیت، خلق نینگ اۉز جانی و مالی نی سقلش اوچون خوفسیزلیک کوچلری نینگ قادریتیگه بولگن ایشانچینی کمه یتیرگن.
منبع: آمو تلویزیون
🌐
