تورکیه مهاجرت اداره سی تامانیدن نشر قیلینگن یېنگی معلوماتلرگه کۉره، جاری میلادی ییل نینگ باشیدن اکتوبر آیی نینگ بیرینچی کونیده قدر، ۲۹ مینگ و ۷۱۲ نفر افغان مهاجر اوشبو مملکتده قانونی حجت لری بۉلمگنی سببلی قولگه آلینگن. بو رسمی آمارلر شونی کۉرسه ته دی که، تورکیه خوفسیزلیک کوچلری تامانیدن قولگه آلینگن بارچه غیر قانونی مهاجرلر آره سیده افغانستان تبعه لری اېنگ کۉپ ساندی تشکیل بېره دی.
افغانلر نینگ تورکیه و باشقه مملکتلرگه دواملی مهاجرتی، افغانستانده گی دوام اېتیب تورگن خوفسیزلیک، جدی یوقسیللیک و ایش فرصتلری نینگ یۉقلیگی نینگ مستقیم نتیجه سی دیب سنه له دی. کۉپلب افغانلر خوفسیز و یخشیراق بیر کېله جک تاپیش اوچون غیر قانونی مهاجرت نینگ جانگه خطرلی یۉللرینی تنله ماقده لر.
تورکیه حکومتی سۉنگگی ییللرده حجتی یۉق مهاجرلرگه قرشی جدی سیاستلرنی عملگه آشیرگن. بو تدبیرلر چېگره گزمه لرینی کۉپه یتیریش، کته شهرلرده مهاجرلرنی انیقلش و قولگه آلیش اوچون کینگ کولملی عملیاتلر و اولرنی تیزلیک بیلن چیقاریب یوباریش جریانینی اۉز ایچیگه آله دی. بو سیاستلر انسان حقوقلری نی حمایه قیلوچی تشکیلاتلر آره سیده جدی تشویشلرنی کیلتیریب چیقارگن.
اوشبو تشکیلاتلرنینگ ایتیشیچه، افغان مهاجرلرنی گروپلشتیریب قولگه آلیش و مجبوراً چیقاریب یوباریش، اولرنی افغانستانگه قَیتیب کیلگنده جدی خطر بیلن دوچ قیله دی. بو تشکیلاتلرگه کۉره، بو کیشیلردن کۉپچیلیکی ایلگری گی فعالیتلری یا-ده علاقه لری سببلی انتقام آلیش خطری آستیده بۉلیشی ممکن.
تحلیلچیلر نینگ ایشانیشیچه، افغان مهاجرلر بحرانی منطقه و دنیا اوچون بیر مرّکب معما بۉلیب، جامع حل یۉللری و خلق ارا همکارلیکنی طلب قیله دی. اولر تأکیدله ی دیلر که، افغانستانده اقتصادی و خوفسیزلیک وضعیتی یخشی لنمگونچه، اوشبو مملکتدن مهاجرت آقیمی دوام اېته دی.
بو وضعیت نینگ دوام اېتیشی بیلن، تورکیه ده مینگلب افغان مهاجرنینگ کېله جگی نامعلوم وضعیتده قالماقده و حقوقنی حمایه قیلوچی اداره لر خلق ارا جمعیتدن اولرنینگ آسیب پذیر وضعیتلریگه فوری دقت قیلیشنی سۉره ماقده لر.
منبع: تورکیه مهاجرت اداره سی
🌐
