بیرلشگن ملت لر تشکیلاتی نینگ مخدره ماده لر و جنایت گه قرشی کوره ش اداره سی (UNODC)، قندهار ولایتی نینگ خاکرېز و ارغستان تومن لریده دېهقان لرنی قۉللب قوتلش مقصدیده زنبورغ (قوزیقورین) نینگ ۵۰ فارمینی قورگنینی معلوم قیلدی. بو اقدام مذکور اداره نینگ آلدین کۉکنار اېکیش بیلن شغللنگن دېهقان لر اوچون آلترناتیو یاکه باشقه کېلیر منبع لری یره تیش بۉییچه سعی و حرکت لری نینگ بیر قسمی دیر.
اوشبو لایحه، دېهقان لر نینگ مخدره ماده لر اېکیش گه اقتصادی باغلیق لیگی نی کمه یتیریش و قندهار نینگ قیشلاق حدودلریده قانونی و فایده لی اېکین لرنی رواجلنتیریش نی مقصد قیلگن. بیرلشگن ملت لر تشکیلاتی مخدره ماده لر گه قرشی کوره ش اداره سی مسؤول لری نینگ ایتیشیچه، زنبورغ اېکیش، سوو گه کمراق احتیاجی و تېز حاصل بېریشی سببلی، بو منطقه لرنینگ اقلیمی شرایطی اوچون مناسب بیر انتخاب سنله‌دی و دېهقان عایله‌لر اوچون بیر تۇرقون کېلیر منبعی نی تامینله شی ممکن.
بو فارم لر، دېهقان لر اوچون کېره کلی اساسی تجهیزات و تخنیکی اۉرگه تیش لر بیلن همراه بۉلگن. اوشبو اداره نینگ متخصصلری، محلی دېهقان لرگه مستقل روشده بو فعالیت نی دوام اېتّیریش لری اوچون زنبورغ اېکیش، پرورش قیلیش و حاصل ییغیش طریقه‌لری حقیده تعلیم بېرگنلر.
افغانستان نینگ جنوبیده جایلهشگن قندهار ولایتی، اوزاق ییل لردن بویان مملکتده کۉکنار اېکیش و تریاک ایشلب چیقریش نینگ اساسی مرکز لریدن بیری بۉلیب کیلگن. قشاقلیک، دېهقانچیلیک محصولاتی اوچون مناسب بازار لرنینگ یۉقلیگی و ییل لر دوام اېتگن اوروش و بی‌ثباتلیک، دېهقان لرنی کۉکنار اېکیش گه یوزلنتیریش گه سبب بۉلگن عامل لردن دیر.
طالبان حکومتی ۲۰۲۱ نچی ییل نینگ اگست آییده قدرت گه قیته کیلگنیدن سۉنگ، بوتون مملکت بۉیلب کۉکنار اېکیش نی منع قیلدی. گرچه بو ممنوعیت کۉکنار اېکیش نینگ فکرگه سیغمیدورگن درجه ده کمه ییشی گه سبب بۉلدی، لیکن آلترناتیو کېلیر منبع لری نینگ یۉقلیگی، کۉپلب دېهقان عایله لرنی جدی اقتصادی قیینچیلیک لر گه دوچ قیلدی.
بیرلشگن ملت لر تشکیلاتی نینگ مخدره ماده لر گه قرشی کوره ش اداره سی و باشقه خلق آرا تشکیلات لر، زنبورغ، زعفران و باشقه دېهقانچیلیک محصولاتی فارم لرینی قوریش کبی لایحه لرنی عملی قیلیش آرقه لی، دېهقان لرگه کۉکنار اېکیش ممنوعیتی دن کېلیب چیققن اقتصادی بحران دن چیقیش لری اوچون یاردم بېریش گه حرکت قیلماقده. شونگه قره‌مسدن، احتیاج لر کینگ دیر و بو لایحه لر فقط ضرر کۉرگن دېهقان لرنینگ کیچیک بیر قسمینی اۉز ایچیگه آله‌دی.
منبع: بیرلشگن ملت لر تشکیلاتی نینگ مخدره ماده لر و جنایت گه قرشی کوره ش اداره سی
🌐
