گزارشلرگه کۉره، کابل نینگ غربیده جایله شگن امید سبز شهرکی نینگ مینگلب یشاوچیسی طالبان حکومتی تامانیدن اویلری نینگ آلینیشی و مجبوراً کۉچیریلیش جدی تهدیدی بیلن دوچ کېلگن. بو وضعیت، اکثریتی هزاره قومیدن بۉلگن بو شهروندلرنینگ مالکیت حقوقلری و خوفسیزلیکلری توغریسیده چوقور خواطرلرنی ایجاد قیلگن.
آتینی آچیقله شنی ایسته مگن محلی منبعلرنینگ ایتیشیچه، طالبان رسميلری اویلرنی آلینیش جریانینی باشله‌گن و یشاوچیلرگه رسانه‌لر و اجتماعی ترماقلر بیلن هر قنده‌ی صحبت قیلیشدن سقلنیشلری حقیده آگاهلنتیرگنلر. اوشبو منبعلرنینگ قۉشیمچه قیلیشیچه، اهالیگه اگر بو جریانگه قرشی مظاهره اویوشتیرسه‌لر یا قتنه شسه‌لر، قوراللی عکس العمل بیلن روپه‌رو بۉلیشلری ایتیلگن.
بیر ییچیم تاپیش اوچون، هزاره قومی نینگ بیر قطار بویوکلری و دین عالملری طالبان نینگ عدلیه وزیری بیلن اوچره شیب صحبت قیلیشگه حرکت قیلگنلر. لیکن منبعلرنینگ معلوماتیگه کۉره، بو حرکتلر حاضرگچه هیچ قنده‌ی نتیجه بېرمه‌گن. ایتیلیشیچه، بو موضوع نی تعقیب قیلیش اوچون حرکت قیلگن بعضی کیشیلر حتی بیر مدت قولگه آلینگنلر.
بیر خصوصیده، سابق ولسی جرگه اعضاسی جنابلری اخلاقی، بو توغریده طالبان رسميلری بیلن صحبت قیلیشگه حرکت قیلگن پیتده، قولگه آلینیب زندانگه تشلنگن. بیر منبع رسانه‌لرگه اونینگ عایله‌سی اویینی ترک اېتگنیدن سۉنگ آزاد قیلینگنینی ایتگن. بو ایش باشقه یشاوچیلرگه طالبان نینگ ایستکلریگه تسلیم بۉلیشلری اوچون باصمنی آشیریب یوبارگن.
بو وضعیت امید سبز شهرکیده مسکن خوفسیزلیگی، مالکیت حقوقلریگه رعایت قیلیش و مجبوراً ییرسیز قالدیریلیش نینگ آل آلینیشی توغریسیده خواطرلرنی کۉپه یتیرگن. شهرک یشاوچیلری مسئول اداره‌لردن اویلری و ملکلری حقیده‌گی هر قنده‌ی قرار نینگ قانونی جریان، عادلانه تیکشیریش و اهالی حقوقلریگه تۉلیق رعایت بیلن عملگه آشیریلیشینی ایسته ماقده‌لر.
اوشبو واقعه، بوندن آلدین هم افغانستان نینگ باشقه منطقه‌لریده طالبانگه باغلیق کیشیلر تامانیدن خلق نینگ ییر و ملکلری آلینگنی حقیده‌گی گزارشلر ترقه لگن بیر پیتده یوز بېرماقده.
منبع: بلال سروری
🌐
