د قرغزستان د بهرنیو چارو وزیر جین
بیک کولوبایف اعلان کړی چې هیواد یې د یوه اروپايي هېواد هغه وړاندیز رد کړی چې له مخې یې، د قرغزستان د وګړو لپاره د کاري فرصتونو د برابرولو په بدل کې به د افغانستان او افریقا کډوال ومني.
د قرغزستان رسنیو د سهشنبې په ورځ، د تلې پر ۲۱مه، راپور ورکړی چې کولوبایف دا موضوع د دغه هېواد د پارلمان د نړیوالو اړیکو، دفاع، امنیت او کډوالۍ چارو د کمېټې په غونډه کې بیان کړې ده. هغه د هغه اروپایی هیواد نوم په ډاګه نه کړ چې دا وړاندیز یې کړی و.
د قرغزستان د بهرنیو چارو وزیر ټینګار وکړ چې د کار په برخه کې د هوکړې لپاره د اروپايي هېواد لخوا وړاندیز شوي شرایط د بشکیک لپاره "د منلو وړ نه وو". هغه زیاته کړه چې د قرغزستان حکومت نه غواړي په دې اړه خبرې اترې وکړي او دا دوسیه تړلې ګڼي.
دغه قرغز چارواکي دا هم روښانه کړه چې که څه هم حکومت په بهر کې د خپلو اتباعو له کار کولو سره مخالف نه دی، خو په هیواد کې دننه د کاري ځواک د کمښت له امله یې په بهر کې د کار موندنې د اسانتیا لپاره دولتي پروګرامونه کم کړي دي. دا د قرغزستان په اقتصادي او کاري بازار کې د لومړیتوبونو بدلون په ګوته کوي.
د قرغزستان دا پریکړه په داسې حال کې کیږي چې ډیری اروپایی هیوادونه د افغانستان په څیر هیوادونو څخه د کډوالو د راتګ اداره کولو لپاره د حل لارو په لټه کې دي. په ځینو دغو حل لارو کې د کډوالو د منلو لپاره له دریمګړو هیوادونو سره معاملې شاملې دي.
د قرغزستان لخوا د دې وړاندیز ردول دا په ګوته کوي چې د منځنۍ اسیا هیوادونه هم د بحران ځپلو سیمو څخه د کډوالو د منلو په اړه محتاطانه پالیسۍ غوره کوي او خپل ملي ګټو او کورنیو شرایطو ته لومړیتوب ورکوي.
سرچینه: د قرغزستان رسنۍ
🌐
