هندستان تشقی ایشلر وزیرلیگی، اوشبو مملکت بیلن روسیه اۉرته سیده افغانستان و پاکستان توغریسیده گی مخصوص صحبتلرنینگ ییتینچی دوری نینگ دهلی نو ده اۉتکزیلگنینی معلوم قیلدی. اوشبو ییغیلیش منطقه نینگ خوفسیزلیک وضعیتی و اونینگ خلق ارا خوفسیزلیککه تاثیریگه دقت قره تدی.
اوشبو وزیرلیک نینگ چهارشنبه کونی نشر قیلینگن خبرنامه سیگه کۉره، ییغیلیش نینگ مشترک ریاستینی هند ملی خوفسیزلیک مصلحتچیسی نینگ اۉرینباسری پاوان کاپور و روسیه خوفسیزلیک کینگشی منشی سی نینگ اۉرینباسری الکساندر وندیکتوف اۉز زمه سیگه آلگن. بو صحبتلر «هند و روسیه نینگ مخصوص و ممتاز استراتیژیک شریکلیگی» چوکاتیده اۉتکزیلدی.
بو ییغیلیشده، ایکّله تامان مشترک علاقه گه اېگه موضوعلر و منطقوی و خلق ارا خوفسیزلیک قیینچیلیکلری باره سیده فکر المه شدی. هند رسانه لری نینگ گزارشیگه کۉره، اساسی دقت افغانستان و پاکستان نینگ وضعیتی و اونینگ منطقه ده گی ثبات گه نتیجه لریگه قره تیلگن.
اوشبو صحبتلر منطقه نینگ خوفسیزلیک اۉزگریشلریگه نسبتاً اۉز پوزیتسیه لرینی ماسلشتیریش اوچون ایکّله مملکت اۉرته سیده گی بیر منظم میکانیزم نینگ بیر قسمی دیر. هند و روسیه هر ایکّله سی افغانستانده تروریستیک گروه لر نینگ فعالیتی و اونینگ قۉشنی مملکتلر و اۉرته آسیا خوفسیزلیگیگه تاثیریدن خواطرده دیر.
اوشبو سفری جریانیده، الکساندر وندیکتوف شونینگدېک هند نینگ ملی خوفسیزلیک مصلحتچیسی اجیت دووال بیلن اوچره شیب صحبت قیلدی. بو اوچره شووده هم مشترک خوفسیزلیک تهدیدلریگه قرشی کوره شیش اوچون ایکّی تامانلمه همکارلیکنی کوچه‌یتیریشگه تاکیدلندی.
هر ایکّله مملکت رسمی لری اوشبو مصلحتلر نینگ دوام اېتیشی نینگ اهمیتیگه تاکیدلب، تورلی ساحه لرده، خصوصاً خوفسیزلیک و تروریزم گه قرشی کوره‌شده ایکّی تامانلمه همکارلیکلرنی کوچه‌یتیریش اوچون اۉز تعهدلرینی قیته دن تصدیقله دیلر. بو ییغیلیشلر جنوبی آسیا ده گی مرّکب خوفسیزلیک قیینچیلیکلریگه قرشی بیر هماهنگ یانداشوونی یره تیش اوچون ایکّی منطقوی کوچ نینگ سعی و حرکتی نی کۉرسه ته دی.
منبع: هندستان تشقی ایشلر وزیرلیگی
🌐
