طالبان حکومتی کنترولی آستیده گی افغان قیزیل آی جمعیتی نینگ رئیسی شهاب الدین دلاور، افغانستان اوچون بریتانیا نینگ مخصوص نماینده سی ریچارد لیندسی بیلن اوچره شیب صحبت قیلدی. اوشبو صحبت نینگ اساسی موضوع سی افغانستانده گی بشری وضعیت و انسان پرورلیک یاردم لرنی کینگه‌یتیریش اېدی.
اوشبو اداره تامانیدن نشر ایتیلگن خبرنامه گه کۉره، جناب دلاور اوشبو اوچره شووده طبیعی حادثه لردن ضرر کۉرگن عایله لر و قۉشنی مملکتلردن یېنگی قه یتیب کیلگن افغان مهاجرلر نینگ قیین وضعیتیگه اشاره قیلگن. او، بو عایله لر نینگ باش پناه، آذیق-آوقات و غیر آذیق-آوقات ماده لری و ساغلیکنی سقلش خدمت لریگه عاجل و جدی ضرورتلری بارلیگینی تاکیدله دی.
افغان قیزیل آی جمعیتی نینگ رئیسی شونینگدېک اوشبو اداره نینگ فعالیتلری حقیده هم معلومات بېردی. او، بو جمعیت نینگ یورک شفاخانه سیده یورک تېشیگی بولگن باله لر اوچون ساغلیکنی سقلش خدمت لری، ییتّی منطقوی زونده کسبی تعلیم برنامه‌لری و شونینگدېک روانی مریض لرنی تداوی قیلیشگه اشاره قیلدی.
جناب دلاور بو ییغیلیشده بریتانیادن بوتون افغانستان بۉیلب محتاج لرگه ییتکزیب بېریش اوچون کینگراق همکارلیک سوره‌دی. بو طلب خصوصاً قه یتیب کیلگن لرنی قۉللب-قوتلش و ساغلیکنی سقلش بخشینی کوچه‌یتیریشگه قره تیلگن اېدی.
اونگه قرشی، خبرنامه گه بناً، افغانستان اوچون بریتانیا مخصوص نماینده سی، مملکتی نینگ قه یتیب کیلگن مهاجرلرنی قۉللب-قوتلشده و ساغلیکنی سقلش ساحه لریده افغان قیزیل آی جمعیتی بیلن موثر همکارلیک قیلیشینی وعده قیلدی.
بو اوچره شوو، قیش فصلی نینگ ییتیب کیلیشی بیلن افغانستانده بشری قیینچیلیکلرنینگ آشیب باریشیدن خواطرلرنینگ کۉپه يگن بیر پیتده یوز بیرماقده، خصوصاً عاجل یاردم گه محتاج میلیونلب کیشی اوچون.
منبع: افغان قیزیل آی جمعیتی خبرنامه سی
🌐
