طالبان حکومتی سۉزچیسی نینگ معاونی حمدالله فطرت، پاکستان نینگ اخیرگی کونر و هلمند ولایت لریگه قیلگن هجوم لریگه عکس العملده، طالبان نینگ «خلق نینگ قانی اوچون انتقام» آله جکینی و پاکستانگه «حساب کتابلی جواب» بېره جکینی ایتدی.
جناب فطرت پنجشنبه کونی ملی تلویزیون بیلن صحبتده، پاکستان اردوسی نینگ اوتگن کېچه کونر نینگ شلتن ولسوالیسی و هلمند نینگ گرمسیر ولسوالیسیده گی یشاش منطقه لرینی بمباران قیلگنینی ایتدی. او، بو هجوم لرنینگ انسان تلفاتیگه علاوه، اوچ اوی نینگ هم بوتونله ی ویران بۉلیشیگه سبب بۉلگنینی قۉشیمچه قیلدی.
طالبان سۉزچیسی نینگ معاونی بو هجوم لرنی «اوروش جنایتی»، «افغانستان توپراغیگه آچیق تجاوز» و خلق ارا اصول لرگه ضد دیب توصیف له ب، قاطع جواب بیریشنی تأکیدله دی.
فطرت ایتدی: «اسلامی امارت ینه بیر بار تأکیدله یدی که، بونده ی تجاوز لرگه جواب اوله راق، اۉز خلقیمیزنینگ قانینی انتقامینی آله میز و پاکستانگه حساب کتابلی جواب بېره میز.»
او شونینگدیک، پاکستان نینگ افغانستان توپراغی نینگ او مملکتگه قرشی قوللنیلیشی حقیده گی ادعاسینی رد قیلیب، پاکستان نینگ «بعض بیر مملکت لر بیلن اۉز امنیتی تعهدلری و کیلیشوولرینی» سقلش اوچون بونده ی ایش لرگه قول اوره یاتگینی نی ادعا قیلدی، لیکن بو حقده کۉپراق توضیح بیرمه دی.
بو کېسکین بیانات، طالبان رهبرلیگی آره سیده پاکستانگه قنده ی جواب بیریش حقیده فکر اختلافی بارلیگی حقیده گی گزارش لرنینگ موجودلیگی پیتیده بیان ایتیلماقده. افغانستان اینترنشنال داخل بعضی منبع لر، طالبان رهبری هبت‌الله آخندزاده نینگ پاکستان نینگ هجوم لریگه حربی جواب بیریشگه قرشی چیققنینی گزارش بیرگن. بیراق، طالبان بو حقده رسمی روشده فکر بیلدیرمه گن.
منبع: ملی تلویزیون، افغانستان اینترنشنال
🌐
