افغانستانده گی بیرلشگن ملت لر تشکیلاتی نینگ یاردم هیأتی (یوناما)، اۉزی نینگ ینگی گزارشیده، اۉتگن اوچ آی جریانیده طالبان نینگ امر بالمعروف و نهی عن المنکر محتسبلری تامانیدن ۴۴۳ مورد اۉزباشیمچه قولگه آلیش و ۹۷ مورد یامان رفتارنی سندلشتیرگنینی اعلان قیلدی.
پنجشنبه کونی، ۲۳ میزانده نشر ایتیلگن اوشبو گزارشده ایتیلیشیچه، بو قولگه آلیشلرنینگ اکثریتی عیاللر اوچون طالبان نینگ حجاب دستورلریگه رعایت قیلمسلیک و اېرکللرنینگ ساقاللرینی قیسقرتیریش یاکه ساچلرینی «غرب طرزیده» توزه تیش عیبلری بیلن بۉلگن.
یوناما نینگ معلوماتیگه کۉره، موسیقی ایشیتیش و جماعت نمازلریده قتنشمسلیک هم اوشبو اۉزباشیمچه قولگه آلیشلرنینگ باشقه سببلریدن بۉلگن. بو موردلر افغانستانده فردی اېرکینلیکلرگه چیکلاولرنینگ کوچه
یگنینی کۉرسته دی.
گزارشده کېلیشیچه، طالبان نینگ امر بالمعروف و نهی عن المنکر قانونی نینگ ۲۴-ماده سی، «منکرات» نی عملگه آشیرگن کیشیلر اوچون اوچ کونگچه حبس جزاسی نی بیلگیله یدی. شونده ی بۉلسه-ده، یوناما شونده ی موردلرنی سندلشتیرگن که، کیشیلر اوچ کون دن آرتیقراق مدت قولگه آلینگن.
مثال اوچون، یوناما ۱۷ اگست کونی پکتیکا ولایتیده گی بیر موردگه اشاره قیله دی که، اونده ایکّی سلمانی ساقال قیسقرتیریش و ساچلرنی «غرب طرزیده» توزه تیش عیبی بیلن بیر آی حبس گه محکوم ایتیلگن.
شونینگدېک، ۲۱ اگست کونی ننگرهار ولایتیده، طالبان محتسبلری جماعت نمازیده دکاندارلرنینگ قتنشمه گنی سببلی تقریباً ۱۰۰ دکاننی یاپگن. بو حرکتلر محلی اقتصاد و اهالی نینگ کونده لیک حیاتیده منفی تأثیر قۉیگن.
یوناما اۉز گزارشیده طالبان حکومتیدن اۉزباشیمچه قولگه آلیشلر و اهالی بیلن یامان رفتارگه چیک قۉییشنی و اولرنینگ اساسی حقلریگه حرمت قیلیشنی سۉره گن.
منبع: یوناما گزارشی
🌐
