کابلده گی روسیه ایلچی خانه سی طالبان حکومتی بیلن پاکستان اۉرته سیده گی حربی تقابل نینگ دوام ایتیشیدن چوقور خواطر بیلدیردی. اوشبو ایلچی خانه شنبه کونی، ۱۱ میزان ده، بیر بیانیه ده بو تۉقنشوولر تینچ اهالیگه، خصوصاً باله لرگه سلبی تأثیر قیلگنینی معلوم قیلدی.
بو بیانیه ده پاکستان نینگ یقینده افغانستان نینگ ایککی ولایتیگه قیلگن هوا هجوملریگه اشاره قیلینیب، بو هجوملر باله لرنینگ اۉلیمی و یره له نیشیگه سبب بۉلگنی ایتیلگن. شونگه قره مه ی، طالبان بیلن یقین علاقه لرگه اېگه بۉلگن آز ساندگی مملکتلردن بیری بۉلگن روسیه، بو هجوملرنی قاره لمه گن.
حاضرگه قدر باشقه هیچ بیر مملکت هم پنجشنبه کونی پاکستان تامانیدن هلمند و کونر ولایتلریگه قیلینگن هوا هجوملرینی قاره لمه گن. بو هجوملر ایککی تامان اۉرته سیده چېگره حدودلریده گی قوراللی گروه لرنینگ فعالیتی یوزه‌سیدن کېسکینلیکلرنینگ آرتگن بیر پیتده یوز بېرگن.
طالبان سۉزچیسی ذبیح الله مجاهد، پنجشنبه کونی بو هجوملرده کمیده ۹ نفر تینچ اهالی اۉلدیریلگنینی ادعا قیلدی. عین پیتده، افغانستانده گی بیرلشگن ملت لر تشکیلاتی نینگ یاردمچی هیئتی (یوناما) هم بو هجوملرده کمیده ۱۰ نفر تینچ اهالی حیاتینی یوقاتگنینی تصدیقله دی.
اونینگ قرشیسیده، پاکستان نینگ اطلاعات و نشریات وزیرلیگی، بو هوا هجوملری «ایشانچلی معلوماتلر» اساسیده افغانستانده گی ایککی مخفیگاه گه قره ته عملگه آشیریلگنینی و اونینگ نتیجه سیده «۲۲ تروریست» اۉلدیریلیب و کۉپ مقدارده قورال و حربی مهمات یۉق قیلینگنینی اعلان قیلگن.
روسیه نینگ خواطری، بو مملکت منطقه ده واسطه چی رولینی اۉینشگه حرکت قیله یاتگن بیر پیتده بیلدیریلماقده. اسلام آباد و کابل اۉرته سیده گی کېسکینلیک نینگ دوامی، مسکو آرزو قیلگن منطقه وی ثباتنی جدی چالشلر بیلن روپه‌رو قیلیشی ممکن.
منبع: رسانه ای گزارشلر
🌐
