طالبان حکومتی بارچه ولایتلر و ولسوالی‌لرده علما کینگشلری نینگ ساختارینی بېلگیلش اوچون ینگی بیر لایحه نشر قیلدی. رسمی جریده‌ده باسیلگن بو سندگه اساساً، «جهادی فکر»گه اېگه بۉلیش، طالبان اداره سیگه تعهد و اوشبو گروه رهبری نینگ فرمانلرینی حمایه قیلیش، بو کینگشلرگه اعضا بۉلیش نینگ اساسی شرط لریدن دیر.
ایکی باب و ۲۲ ماده‌دن عبارت بو لایحه، دینی علما کینگشلری نینگ محلی سویه‌ده گی ساختارینی مشخص قیله‌دی. هر کینگش بیر رئیس، معاون، اداری و مالی مسئول و بیر قطار اعضادن تشکل تاپه‌دی. اعضالرنینگ دقیق سانی طالبان رهبری، ملا هبت‌الله آخندزاده نینگ «تشخیصی و صلاح دیدی»گه باغلیق بۉله‌دی.
بو سندگه کۉره، بو کینگشلرنینگ اساسی وظیفه‌لری طالبان نظامینی حفظ قیلیش، اوشبو گروه رهبری نینگ فرمانلرینی خلق ارا سیده تبلیغ قیلیش و جامعه نی اونگه اطاعت قیلیشگه قناع لنتیریش دن عبارت دیر. بو کینگشلر شونینگدیک، خلق نینگ محلی طالبان مسئوللریدن شکایت قیلگن صورتده، اولرگه اصلاحی توصیه‌لر تقدیم ایتیش و اصلاح بۉلمگن تقدیرده، موضوعنی تۉغریدن تۉغری ملا هبت‌الله‌گه گزارش بېریش صلاحیتیگه اېگه دیرلر.
بو لایحه‌نی تحلیل قیلیش شونی کۉرسته‌دی که، علما کینگشلری، آلدینگی نظام لرگه عکسینچه، هیچ بیر دولتی ارگانگه باغلیق اېمسلر. بو کینگشلر تۉغریدن تۉغری طالبان رهبریگه باغلنگن مستقل بیر محلی شبکه صفتیده عمل قیله‌دیلر. شونده‌ی بۉلسه-ده، بو سندده مملکت سرتاسری علما کینگشی حقیده هیچ قنده‌ی توضیح بېریلمه‌گن.
بعضی تحلیلچیلرنینگ ایشانچیچه، طالبان رهبری نینگ بو ساختاردن مقصدی، ملالرنی محلی سویه‌ده اۉزی نینگ «مدافع لشکری» صفتیده بند قیلیب، اولرنی مملکت نینگ کلان مسئله لریدن قرار قبول قیلیش و نظارت قیلیشدن اوزاقده ساقلش دیر.
بو لایحه‌ده گی باشقه بیر ابهام، مالی مسئله لردیر. سندده کۉپ مرته کینگشلرنینگ مالی امکانلری و گزارش بېریشیگه اشاره قیلینگن، لیکن طالبان رهبری بو کینگشلر اوچون قنچه مقدار بودجه نظرده توتگنی و بو بودجه نینگ شفاف‌لیگی و مصرف میکانیزمی قنده‌ی بۉلیشی آنیق اېمس.
بو وضعیت، ملا هبت‌الله نینگ ۱۴۰۲- ییل ۹- حوتده تعزیری جزالر قانونینی توشیح قیلگنیدن سۉنگ یوز بېرماقده که اونده علما اوچون اینگ یوکسک امتیاز نظرده توتیلیب و جرم صادر ایتگن صورتده، اولرنینگ جزاسی جوده یېنگیل بېلگیلنگن اېدی.
منبع: افغانستان اینترنشنل
🌐
