افغانستان اوچون امریکا نینگ سابق مخصوص نماینده سی زلمی خلیلزاد، چینده ایشلب چیقریلگن برقی و زمانه وی موترلر نینگ بویوک بیر خوفسیزلیک تهدیدی اېکن لیگینی و اساساً حرکتده گی جاسوسلیک و کۉزه توو مرکز لری صفتیده ایش قیله یاتگنینی معلوم قیلدی. بو آگاهلنتیریش ناروی ده گی سونگگی بیر حادثه گه جواباً بېریلگن.
جناب خلیلزاد ناتو اتفاقداشلری ییللیگه چین دن بیر میلیون دن آرتیق واسطه وارد قیلیشینی و بو رقم نینگ دواملی روشده آشماقده اېکنینی یازگن. او بو مسئله نی ناتو و اروپا اتفاقی اوچون نهایتده بویوک بیر خوفسیزلیک تهدیدی دېب اته گن.
او اروپا کمیسیونی، اروپا کینگشی و خصوصاً جرمنی دن بو توغریده گی سیاست لرینی فوری اۉزگرتیریش لرینی طلب قیلگن. بو طلب، اوشبو موترلر آرقه لی سایبری خوفسیزلیک و جاسوسلیککه عاید جدی تشویشلرنینگ اورته گه چیقیشی آرتیدن کیلماقده.
بو آگاهلنتیریش ناروی ده، ناتو نینگ حساس حربی مرکز لری یقینیده پارک قیلینگن چین نینگ برقی موترلری نینگ کمره لری و سنسور لری نینگ، اپلیکیشن و مرکز معلوماتلرینی چین سرور لریگه انتقال بېریشی آرتیدن بېریلدی.
بو حادثه نتیجه سیده ناروی نینگ استخبارات اداره سی مدافعه سیرلریگه اېریشیش توغریسیده تشویش بیلدیردی. خبر منبع لری نینگ معلوماتیگه کۉره، نتیجه ده ناروی حکومتی اوشبو موترلرنینگ اۉز حربی مرکز لریگه کیریشینی منع قیلگن.
بو حادثه غرب مملکت لریده مهم زیربنا لرنینگ خوفسیزلیگی و چین تکنالوژی سیگه بغلی لیک توغریسیده کینگ بحث لرنی یولگه قویگن. خوفسیزلیک متخصصلری، واسطه لرنینگ هوشلی بولیب باریشی بیلن، اولرنینگ جاسوسلیک مقصد لری اوچون قوللنیلیش خطری هم آشیشیگه ایشانه‌دیلر.
جناب خلیلزاد غرب مملکت لری نینگ بو «خطرلی پدیده» گه قرشی هوشیار بولیش لری و اۉز ملی خوفسیزلیک لرینی سقلش اوچون کیره کلی آدیم لرنی تشلشلری کیره ک لیگینی تاکیدله‌گن. او چین دن تکنالوژی وارداتی اوچون قطعی خوفسیزلیک معیار لری نینگ قوییلیشینی تکلیف قیلگن.
منبع: Zarin TV
🌐
