۵ اکتوبر (۱۳ میزان)، خلق ارا معلم کونی مناسبتی بیلن، طالبان حکومتی کوپلب مملکت لر و خلق ارا تشکیلات لر نینگ خلافیگه، معلم لرنی قوتلش اوچون هیچ قندهی رسمی پیام ترقه تمه‌دی. گزارش لر اساسیده، طالبان مقام لری ایریم ولایت لرده گی مکتب لرده بو کوننی نیشانلش مراسم لری نینگ آلدی نی آلگن.
افغانستان اینترنشنل نینگ معلوماتیگه کوره، کابل، بلخ و هرات شهریده گی بیر قطار اوقیتووچی لر، طالبان مسؤل لری نینگ مکتب لرگه معلم کونینی نیشانلشدن سقلنیش اوچون دستور بیرگنینی تایید قیلگن. طالبان معارف وزیرلیگی و باشقه اداره لری نینگ رسمی صحیفه لری تیکشیریلگنده هم، بو مناسبت بیلن هیچ قندهی بیانات نشر ایتیلمگنی کورینه‌دی.
بو سکوت شوندهی بیر حالده یوز بیرماقده که، یونسکو، یونیسف و خلق ارا ایش تشکیلاتی بیانیه‌لر چیقریب بو کوننی نیشانله‌دی. ۵ اکتوبر ۱۹۹۴ نچی ییلدن بیری خلق ارا معلم کونی دیب اتلگن. یونسکو بو ییل بو کوننی «معلم لر یانیده توریب؛ معلم لیک کسبی نی ۶۰ ییل حمایه قیلیش» شعاری بیلن نیشانلب، تعلیم نینگ کېله جگیده اوقیتووچی لرنینگ حیاتی رولیگه تاکید قیلدی.
کابلده بیر معلم افغانستان اینترنشنل گه ایتگن: «مکتبیمیزده معلم لرنی تقدیرلش اوچون مراسم اوتکزیلیشی قرار قیلینگن ایدی، لیکن بیزگه مکتب لر معلم کونینی نیشانلشگه اجازه سی یوق دییلدی.» بلخ ولایتیده هم، لینا کریمی (مستعار اسم) اسملی بیر اوقیتووچی، طالبان نینگ معارف اداره سی مکتب لرگه هیچ قندهی مراسم اوتکزمَسلیکنی بویرگنینی ایتدی.
بونگه قرشی، افغانستان نینگ سابق جمهور رئیسی حامد کرزی، بیر پیام نشر قیلیب مملکت اوقیتووچی لری نینگ سعی و حرکت لریدن قدردانلیک قیلدی. او، معلم لرنینگ آز امکانیت و قیین شرایط لرگه قره‌می، کېله جک نسل لرنی اوقیتیش و تربیه لش مسئولیتی نی صداقت بیلن بجریب کیلگنینی ایتدی. جناب کرزی ینه بیر بار افغانستان نینگ استقلالی و عزتی اوچون قیزلر و اوغلانلر نینگ تعلیم آلیشی نینگ اهمیتیگه تاکید قیلدی.
طالبان حکومتی نینگ معلم کونی گه نسبتن سکوتی، افغانستان نینگ دنیا ده آلتینچی صنفدن یوقاری قیزلر تعلیم حقی دن محروم بولگن یگانه مملکت ایکنلیگی شرایطیده دوام ایتماقده. اوتگن بیش ییلدن کوپراق واقت دوامیده، بو چیکلاو لر طالبان حکومتیگه قرشی خلق ارا تنقید لرنینگ اساسی محوریگه ایلنگن. دنیا معلم لرنینگ «کېله جک نی شکللنتیریشده گی» رولی حقیده گپیرر ایکن، افغان معلم لری بو ییل حتی کیچیک بیر مراسم اوتکزیلیشیگه هم رخصت بیریلمگنی نی ایتماقده لر.
منبع: Afghanistan International
🌐
