ایران نینگ سپاه پاسداران دېنگیز کوچلری، «متخلف» دېب اته لگن بیر نفت تانکری یکشنبه کونی، ۲۶ میزان ده، هرمز تنگه سی نینگ جنوبیده بیر دېنگیز ماینی گه اوریلگنیدن سونگ پارتلب، آتش آلگنینی معلوم قیلدی.
سپاه پاسداران، عکسلر ترقه تیب، بو حادثه نینگ یکشنبه آخشام یوز بېرگنینی و اونینگ نتیجه سیده کېمه نینگ ماشین خانه سیده آتش توتگنینی ایتگن. بو کوچلر هرمز تنگه سینی بویوک خطرلی بیر منطقه دېب اعلان قیلگن.
حاضرگه قدر کېمه خدمه سی نینگ وضعیتی و نفتکش گه یئتگن زیانلر حقیده هیچ قنده‌ی تفصیلات ترقه تیلمه‌گن. بو نفتکش نینگ کیملیگی و اېگه لیگی هم هلی انیقلنمه‌گن.
بو حادثه، نفت ترانزیتی اوچون دنیا نینگ اېنگ مهم سوو یوللریدن بیری بولمیش بیر منطقه ده یوز بېرگن. بوندن آلدین هم بو منطقه ده شونگه اوخشش حادثه لر یوز بېرگن اېدی کی فارس خلیجیده گی کیسکینلیک نینگ آشیشیگه سبب بولگن.
سپاه پاسداران نینگ دېنگیز کوچلری آلدین امریکا بیلن بولگن کیسکینلیکلر جریانیده هرمز تنگه سینی ماینلشتیریب قویگنینی اعلان قیلگن و کېمه لردن خوفسیز اوتیش اوچون ایران بیلن هماهنگ بولیشلرینی سوره‌گن اېدی.
عین حالده، «بریتانیا نینگ دېنگیز تجارتی عملیات مرکزی» دوشنبه کونی، بو ییل نینگ مارچ آیی نینگ بیرینچی کونیدن اکتوبر آیی نینگ ۱۸ نچی کونیده قدر بو منطقه ده کېمه لر اوچون ۱۵۳ حادثه ثبت ایتیلگنینی اعلان قیلدی. بو رقم بو منطقه ده کېمه چیلیک اوچون خوفسیزلیک نینگ کمه ییب باره یاتگنینی کورسته‌دی.
بو تشکیلات، هرمز تنگه سینی ماین پارتلش احتمالی و پیلوتسیز اوچاق و موشک هجوملری سببلی، دنیا ده گی سوو واسطه لری اوچون اېنگ خطرلی منطقه دېب توصیف قیلگن.
منبع: Zarin TV
🌐
