بادغیس ولایتیده گی محلی منبعلر، بو ولایت نینگ قادس و بالامرغاب ولسوالی لریده ایکّی علیحده خوفسیزلیک واقعه سی حقیده خبر بېرگنلر. بو واقعه لرنینگ بیریده، ایکّی طالب عضوی اۉلدیریلگن.
۸صبح روزنامه سی نینگ گزارشیگه کۉره، منبعلر سه‌شنبه کونی، ۲۸ میزان، قادس ولسوالی سی نینگ «شهر ارمن» منطقه‌سیده طالبان نینگ بیر خوفسیزلیک پوسته‌سی اوستیده آتیشمه یوز بېرگنینی ایتگنلر. بو آتیشمه و اونینگ احتمالی تلفاتلری حقیده کۉپراق معلومات قولگه کیریتیلمه‌گن.
شو کونده گی باشقه بیر واقعه ده، بادغیس ولایتی اوچون طالبان والیسی نینگ موتری بالامرغاب ولسوالی سیده راکېته هجومیده نشانگه آلینگن. محلی منبعلر بو هجومده موترده گی ایکّی طالب عضوی نینگ اۉلدیریلگنینی تصدیقله‌گنلر.
اۉلدیریلگن کیشیلرنینگ کیملیگی و هجوم نینگ قنده‌ی یوز بېرگنی حقیده انیق معلوماتلر هنوز نامعلوم. حاضرگچه هیچ قنده‌ی گروه بو هجملرنینگ مسئولیتی نی اۉز بوینیگه آلمه‌گن.
بادغیسده گی طالبان نینگ محلی رسمی لری هم حاضرگچه بو واقعه لر حقیده فکر بیلدیرمه‌گنلر. بو هجملر، مملکت نینگ مختلف منطقه لریدن طالبان کوچلری و قوراللی مخالف جبهه‌لر اۉرته سیده گی آتیشمه‌لر حقیده گزارشلر ترقه لیب تورگن بیر پیتده یوز بېرماقده.
افغانستان نینگ غربیده گی بادغیس ولایتی آلدین هم طالبانگه قرشی فعالیتلرنینگ شاهدی بۉلگن. بو ولایت جغرافیایی و تاغلیک موقعیتی سببلی، مخالف قوراللی گروه لر اوچون خوفسیز بیر پناهگاه گه ایلنیشی ممکن.
منبع: ۸صبح روزنامه‌سی
🌐
