افغانستان جمهوریت ریاستی نینگ ایشلر اداره سی نینگ سابق باشلیغی فضل محمود فضلی، پاکستان نینگ قۉشنیلری بیلن سودا یۉللرینی یاپیش بیلن، اۉز اقتصادینی تشقی و ژئوپلیتیک مقصدلر اوچون قربان قیله یاتگنینی ایتدی.
جناب فضلی، پاکستان نینگ ایران بیلن سودا یۉللرینی یاپیشیگه عکس العملده بو گپلرنی ایتدی. بو حرکت، افغانستان و هندوستان چېگره لریده گی چېکلاولردن سۉنگ عملگه آشیریلدی. او پاکستان نینگ نخبه‌لری، رسانه‌لری و سوداگرلیک جماعه سیدن بو قرارلرنینگ اصلی سببلرینی اۉز حکومتیدن سۉره شلرینی طلب قیلدی.
فضلی نینگ ایتیشیچه، بو ایشلرنینگ «هیچ قنده‌ی ایچکی و ملی منطقی یۉق» و فقط «تشقی کوچلر و ژئوپلیتیک ایستکلر آلدیده باش اېگیش و اطاعت» دیر. او بو قرارلرنینگ پاکستان اقتصادی و خلقیگه جدی زیان یېتکیزیشیگه ایشانه‌دی.
ایشلر اداره سی نینگ سابق باشلیغی قۉشیمچه قیلدی کی، پاکستان نینگ حاضرگی نظامی ایران دن تارتیب افغانستان، هندوستان و گوادرگچه، اۉز اقتصادینی تشقی حامی لری نینگ منفعتلری و امپراتورلیک مقصدلرینی تأمینلش اوچون آیاق آستی قیلیب قۉیماقده. او بو ایشلرنی بیر نوع «اقتصادی اۉزینی-اۉزی یاقیش» دیب توصیفله دی.
فضلی، پاکستان حکومتی بو قرارلر بیلن، اۉز خلقی و زحمتکش سوداگرلرینی آغیر مالی و اقتصادی جزالرگه دوچ قیله یاتگنینی تأکیدله دی. او «پاکستان نینگ بو اقتصادی اۉزینی-اۉزی یاقیشیدن کیم فایده کۉره‌دی و اونینگ بهاسینی نېگه بیگناه خلق تۉلیدی؟» دېگن سۉراقنی اۉرته گه تشله دی.
بو بیانات، پاکستان تامانیدن چېگره اۉتیش یللرینینگ، خصوصاً افغانستان چېگره سیده، تېز-تېز یاپیلیشی هر دایم افغان سوداگرلری و اقتصادی اوچون جدی معمالر یره تیب کېله‌یاتگن بیر پیتده ایتیلدی.
منبع: فضل محمود فضلی
🌐
