د امریکا د مرکزي قوماندانۍ (سنټکام) قوماندان، جنرال برډ کوپر، د یکشنبې په ورځ، د لړم په دریمه، د هرمز له تنګي څخه لیدنه وکړه. کوپر وویل: "موږ لاهم په فارس خلیج کې د خپلو شریکانو او د بېړۍ چلونې صنعت سره اوږه په اوږه ولاړ یو. دا لیدنه د هرمز په تنګي کې د بېړۍ چلونې د ازادۍ د دوام لپاره زموږ په قوي ژمنتیا ټینګار کوي."
د امریکا د پوځ مرکزي قوماندانۍ اعلان وکړ: "نن د هرمز په تنګي کې د تګ راتګ اصلي لارې زموږ د ځواکونو د فوق العاده هڅو په برکت، د ایران له سمندري ماینونو څخه پاکې او د تګ راتګ لپاره خلاصې دي."
سنټکام زیاته کړه چې په تیرو شپږو میاشتو کې، د ۳۰۰۰ څخه زیاتې سوداګریزې بېړۍ د سنټکام ځواکونو په ملاتړ په بریالیتوب سره د هرمز له تنګي څخه تیرې شوې دي. د سنټکام په وینا، په دې وروستیو میاشتو کې له ۹۵ سلنې څخه زیاتې بېړۍ چې په هرمز تنګي کې یې تګ راتګ کړی، په خوندي توګه سفر کړی دی.
دغه قوماندانۍ وویل چې دا په ډاګه کوي چې امریکا او سیمه ییز شریکان یې د دې نړیوالې اوبلارې کنټرول په لاس کې لري. برډ کوپر د امریکا د پوځ په یوه سي-اېچ-۴۷ شینوک هلیکوپتر کې د دې نړیوالې اوبلارې څخه د الوتنې پرمهال، اوسني عملیاتي شرایط وڅېړل.
په وروستیو میاشتو کې، وروسته له هغه چې امریکایي ځواکونو د هرمز په تنګي کې د نړیوالو کښتیو له لارو څخه د سپاه پاسداران له خوا اېښودل شوي سمندري ماینونه پاک کړل، فعالیتونه په چټکۍ سره دوام لري.
کوپر د خپل سفر په ترڅ کې له هغو امریکایي پوځيانو سره هم وکتل چې د ماین پاکولو په ماموریت کې یې برخه اخیستې وه او د هغوی له ژمنتیا او پرله پسې هڅو یې مننه وکړه.
سرچینه: د امریکا مرکزي قومانداني (سنټکام)
🌐
