سعودی عربستان، تورکیه و پاکستان نینگ یوقاری مرتبه لی دفاعی و استخباراتی مقام لری، که «مکه دفاعی پیمانی» نینگ اوچ کلیدی اعضاسی دیرلر، بوگون دوشنبه کونی، ۴ عقرب ده، مهم منطقه یی صحبت لر اوچون تهرانگه باریشلری قرارلنگن.
رویترز خبر آژانسی ایکّی خبردار منبع گه تیه نیب سعودی عربستان دفاع وزیری شهزاده خالد بن سلمان، پاکستان قوشونی نینگ باشلیغی جنرال عاصم منیر و تورکیه استخبارات اداره سی نینگ رئیسی ابراهیم کالین نینگ بو هیئت ترکیبیده ایکن لیگینی گزارش قیلدی. ایران ملی خوفسیزلیک عالی کینگشی معاونی علی باقری هم بو سفرنی تاییدله دی.
بو سفر حساس بیر پیتده بولیب اوتماقده و یمن حوثی لری نینگ سعودی عربستانگه هجوملری آرتگنیدن بویان ایران و بو اوچ مملکت آره سیده بونچه یوقاری سویه ده گی بیرینچی تماس حسابلنه دی. بو صحبت لرنینگ اساسی مقصدی، منطقه یی هماهنگی لر و تنش لرنی کمه یتیریش عنوان قیلینگن.
تورکیه، پاکستان و سعودی عربستان جاری میلادی ییل نینگ آگست آییده مکه دفاعی توافقنامه سینی امضاله دیلر. بو پیمان اساسیده، اوچ مملکت دن هر بیریگه قوراللی هجوم، برچه اعضاگه هجوم دېب سنله دی. بو پیمان منطقه یی تهدیدلر، اینیقسه حوثی لرنینگ هجوم لریگه جواب اوله راق شکللنگن.
ایران منطقه مملکت لری و غرب تامانیدن یمن حوثی لریگه حربی و مالی حمایت قیلیش بیلن متهم دیر، اما تهران هر دایم بو اتهام لرنی رد قیلیب و حوثی لرنینگ مستقل روشده حرکت قیلیش لرینی ایته دی. شوندهی بولسه ده، ایران تامانلر توافق قیلگن تقدیرده حوثی لر و سعودی عربستان آره سیده واسطه چیلیک قیلیش گه مایل ایکن لیگینی بیلدیرگن.
تورکیه و پاکستان پارلمان لریده مکه پیمانی نینگ سونگگی هفته لرده تصویب ایتیلیشی، بو حربی ائتلاف نینگ فعال لشتیریلیشی حقیده گی گمان لرنی کوچه یتیرگن. اعضا مملکت لرنینگ وزیرلری یقینده ریاضده سعودی عربستانده کوچلرنی تېز جایلشتیریش زمینه سینی یره تیشگه کیلیشدیلر. بو یوقاری هیئت نینگ تهرانگه سفری هر قندهی حربی تنش نینگ آشیشیدن آلدین بیر دیپلوماتیک ییچیم تاپیش اوچون بیر سعی و حرکت بولیشی ممکن.
منبع: رویترز
🌐
