پنجشیر ولایتیده گی طالبان نینگ محلی مقام لری، بیرینچی مرته اوشبو ولایت نینگ کانلریدن استخراج قیلینگن زمرد پایتختده کیم آشار ساتیگه قۉییلیشینی اعلان قیلدیلر. بو کیم آشار ساتی کابلده گی افغانستان خلق ارا کورگزمه لر مرکزی ده اۉتکزیلیشی ریجه لنگن.
پنجشیرده طالبان والیسی محمد آغا حکیم، بو اقدام نی پنجشیر نینگ معدنی ظرفیت لرینی ایچکی و تشقی سوداگرلرگه تنیتیش اوچون مهم بیر فرصت دېب بیله دی. بو کیم آشار ساتی پنجشنبه کونی، یتّینچی عقرب گه، ریجه لنگن و اونده کۉپلب ساتیب آلووچی لرنینگ اشتراک ایتیشی کوتیلماقده.
جهان شهرتیگه ایگه بۉلگن پنجشیر زمرد کانلری، افغانستان اوچون مهم درآمد منبع لریدن بیری حسابلنه دی. طالبان قدرت گه ایگه بۉلگنیدن بویان، بو قیمتی تاشلرنینگ استخراجی و ساتیلیشی اوشبو گروه نینگ نظارتی آستیده دوام ایتماقده. طالبان مقام لری نینگ ایتیشیچه، جاری ییلده پنجشیردن ساتیگن زمرد نینگ قیمتی تقریباً ۴۰۰ میلیون افغانی گه (تقریباً ۶.۱۲ میلیون دالرگه برابر) ییتگن.
شوندهی بۉلسه-ده، تحقیقی گزارش لر بو جریان نینگ شفافلیگینی سوال آستیگه قۉیگن. افغانستان اینترنشنل نینگ آلدینگی گزارشی کورسه تیشیچه، زمرد استخراجی نینگ بویوک بیر قسمی طالبان بیلن تۉغریدن تۉغری علاقه سی بۉلگن قراردادلر اختیاریده و بو جریان اوشبو گروه کوچلری نینگ نظارتی آستیده عملگه آشیریله دی.
بیر خبردار منبع اوشبو رسانه گه استخراج قیلینگن زمرد نینگ یریمیدن آزراغی رسمی کیم آشار ساتیلریگه یول تاپیشی و اونینگ بویوک بیر قسمی غیررسمی یوللر آرقه لی و نامعلوم قیمت لر بیلن ساتیلیشینی ایتگن. اونینگ ایتیشیچه، اهمیتلی درآمدلرگه قره مسدن، بو صنعت پنجشیر خلقی نینگ محلی اقتصادینی یخشی لش گه کۉزگه کورینرلی تاثیر قیلمه گن.
طالبان نینگ رسمی اعلان لری معمولاً اساس قیمت، رقابت جریانی و تاشلرنی بهالنتیریش معیارلری حقیده جزئیات بېرمه یدی و ساتیلیشدن آلدین بو قیمتی تاشلرنینگ مستقل کارشناسلر تامانیدن بهالنگنیدن هیچ قندهی نشانه یوق. بو شفافلیک نینگ یوقلیگی مملکت طبیعی منبعلری نینگ قندهی مدیریت قیلینیشی حقیده خواطرلرنی یره تگن.
منبع: افغانستان اینترنشنل
🌐
