«جهان عدالت پروژه سی» تامانیدن نشر ایتیلگن «قانون حاکمیتی شاخصی» نینگ ینگی گزارشیگه اساساً، افغانستان جنوبی آسیا مملکت لری آره سیده اینگ یمان اۉریننی اېگلله‌گن. دنیا سویه‌سیده گی رده بندیلیکده هم افغانستان ۱۴۳ مملکت آره سیدن ۱۴۲ نچی اۉرینده قرار تاپگن و فقط ونزوئلا اوندن کۉره یمانراق وضعیت گه اېگه.
بۇ گزارش، دنیا سویه‌سیده دانمارک، ناروی و فنلند مملکت لری نینگ قانون حاکمیتی نینگ اینگ یخشی اوچ مملکتی صفتیده تانیلگنینی کۉرسته‌دی. قانون حاکمیتی شاخصی، مملکت لرنی «دولت اختیاراتی نینگ قانونی چیکلنیشی، فساد نینگ یۉقلیگی، آچیق حکومتدارلیک، اساسی حقوق لرگه رعایت قیلیش، نظم و امنیت، مقررات نینگ اجرا ایتیلیشی، مدنی عدالت و جنایی عدالت» کبی معیار لر اساسیده بهاله‌یدی.
افغانستان بو شاخص لرنینگ کۉپچیلیکیده جوده تۉمن امتیاز قولگه کیریتگن. گزارش، بو مملکت نینگ امتیازی نینگ ۲۰۲۰ نچی میلادی ییلدن بویان دواملی شکلده توشیب باره یاتگنینی و ۲۰۲۰ نچی ییلده گی ۰.۳۶ امتیازدن جاری ییلده ۰.۳۱ امتیازگه توشگنینی کۉرسته‌دی. افغانستان نینگ دنیا سویه‌سیده گی اۉرنی اۉتگن ییلگه نسبت تغییر قیلمه‌گن.
«جهان عدالت پروژه سی» اۉز گزارشیده، تۉقیزینچی ییل دوامیده دنیا نینگ کۉپچیلیک مملکت لریده قانون حاکمیتی نینگ ضعیفلشیب باره یاتگنینی ایتگن. بو پروژه نینگ اجرایی مدیری آلخاندرو پونس نینگ ایتیشیچه، قانون حاکمیتی تینچ جامعه لرنینگ بنیادی دیر، لیکن اونینگ دنیا سویه‌سیده ضعیفلش جریانی دوام ایتماقده و اقتدارگرالیک کۉپ جای لرده ایلدیز آتگن.
بو گزارش مشخص شکلده طالبان نینگ قیته قدرت گه کېلگنیدن سونگگی افغانستان وضعیتی گه اشاره قیله‌دی. آلدینگی اساسی قانون نینگ لغو ایتیلیشی و مملکت نینگ طالبان رهبری نینگ فرمان لری اساسیده اداره ایتیلیشی، بو مملکتده قانون حاکمیتی نینگ جدی ضعیفلشیگه سبب بۉلگن دلیل لردن دیر. بوندن تشقری، اساسی آزادلیک لرگه کینگ چیکلاو لر و مملکت اهالی سی نینگ انسانی حقوق لری نینگ پامال ایتیلیشی هم بو تۉمن رتبه‌ده تأثیرلی بۉلگن.
منبع: جهان عدالت پروژه‌سی
🌐
