طالبان حکومتی نینگ تشقی ایشلر وزیری امیرخان متقی نینگ ایتیشیچه، «افغانستان نینگ قۉنشی لیگیده» مخدره ماده لرنینگ کینگ ایکیلیشی و قاچاقی بو گروه اوچون اینگ کته خواطر دیر. او، مشخص بیر مملکت نینگ نامینی ایتمسدن، دنیا جماعتی دن بو معضلگه دقت قیلیشنی ایسته‌دی.
بۇ اظهارات سه‌شنبه کونی (۵ عقرب) کابلده «افغانستان اسلام امارتی نینگ مخدره ماده لر بیلن کوره شی: حقیقت لر و یوتوق لر» ناملی بیر ییغیلیشده بیان ایتیلدی. جناب متقی، تشقی دیپلمات لر حضوری بیلن اۉتکزیلگن بو ییغیلیشده، اگر دنیا افغانستان نینگ قۉنشی مملکت لریده مخدره ماده لر ایشلب چیقریلیشی و قاچاقی نینگ آلدینی آلیش گه یاردم بېرمسه، طالبان نینگ بو پدیده بیلن کوره شی نینگ توگه للنمه‌ی قاله جگینی تاکیدله‌دی.
او شونینگدیک، افغانستانده مخدره ماده لر وضعیتی حقیده گزارش بېریش طرزیدن تنقید قیلیب ایتدی: «اگر بیزنینگ حرکت لریمیز دقیق شکلده بهالنمسه، گزارش لر غیر حرفه‌ای شکلده تیارلنسه و یا غرضلی روایت لر ترویج ایتیلسه، مخدره ماده لر بیلن کوره شیمیزگه کته ضربه ییتیب باره‌دی.»
طالبان تشقی ایشلر وزیری، بو گروه رهبری نینگ مخدره ماده لرنی منع قیلیش حقیده گی فرمانی نینگ، اولرنینگ بو زمینه ده گی قاطع موضعینی ایفاده قیلیشینی و اولرنینگ اۉз تعهد لریگه باغلیق ایکنینی قۉشیمچه قیلدی. طالبان حکومتی مملکتنی قیته قولگه کیریتگندن بویان کۅکنار ایکیشنی صفرگه ییتکزگنینی ادعا قیلیب کېله‌دی.
عین پیتده، طالبان تشقی ایشلر وزیرلیگی نینگ مالی و اداری معاونی محمد نعیم هم بو ییغیلیشده صحبت قیلدی. او، دهقان لر اوچون اۉرین باسر تیریکچیلیک تأمین لش، معتاد لرنی تداوی قیلیش اوچون ساغلیق مرکز لریدن حمایت قیلیش و مخدره ماده لرگه قرشی کوره شده طالبان نینگ «یوتوق لری»نی سقلش اوچون تخنیکی و منطقه‌ای همکارلیک لرنی ضروری دیب بیله‌دی.
بۇ اظهارات، بیرلشگن ملت لر تشکیلاتی نینگ گزارش لری، کۅکنار ایکیلیشی نینگ اهمیتلی درجه ده کمه ییشیگه قره‌مسدن، افغانستانده صنعتی مخدره ماده لر، خصوصاً متامفتامین (شیشه) ایشلب چیقریلیشی نینگ جدی شکلده کۉپه یگنی و بو مملکت نینگ منطقه ده بو ماده نینگ اصلی ایشلب چیقرووچی لریدن بیریگه ایلنگنینی کۉرسته‌یاتگن بیر پیتده مطرح بۉلماقده.
منبع: طالبان تشقی ایشلر وزیرلیگی
🌐
