طالبان مقام‌لری پنج‌شنبه کونی قندهارده شوراندام سمنت فابریکه‌سی نینگ بیرینچی فازی نی ایشگه توشیردی. اوشبو فابریکه کونده ۱٬۵۰۰ تُن سمنت ایشلب چیقریش ظرفیتیگه ایگه. بو فابریکه قندهار نینگ شوراندام صنعتی منطقه‌سیده خصوصی سرمایه بیلن قوریلماقده و طالبان نینگ معادن و پترولیم وزیرلیگی نینگ معلوماتیگه کۉره، بو لایحه‌گه کیریتیلگن سرمایه مقداری ۱۱۳ میلیون دالرگه ییتگن.
قوریلیش ایشلری ۲۰۲۳-ییلی مارچ آییده باشلنگن بو لایحه، توگه لنگندن سۉنگ، کونده‌لیک ایشلب چیقریش ظرفیتی نی تقریباً ۵٬۰۰۰ تُن گه ییتکیزیشی ریجه لنتیریلگن. طالبان حکومتی باش وزیری نینگ اقتصادی اورینباسری عبدالغنی برادر، آچیلیش مراسمیده ایتگن که افغانستان ایچکی منبعلردن کۉپراق فایده لنیب و صنعتی ایشلب چیقریشلرنی کینگه‌یتیریب، دواملی اقتصادی رواجلنیشگه ایریشه آلدی.
اونینگ سۉزلریگه کۉره، طالبان حکومتی نینگ اقتصادی استراتیژیسی، افغانستان نی تدریجی روشده بیر مصرفی اقتصاددن ایچکی ایشلب چیقریش تامان یۉنه لتیریش دیر، تا که مملکت نینگ ضروریتلری ایچکریدن تأمینلنیب و صادراتی کۉپه یسین. جناب برادر، افغانستان سمنت ایشلب چیقریش اوچون مهم ایچکی منبعلرگه ایگه ایکنینی و محلی ایشلب چیقریشلر مملکت نینگ قوریلیش سکتوری نینگ تقاضاسینی تأمینلشده مهم رول اۉینه شی ممکن ایکنینی قۉشیمچه قیلدی.
آلدینراق، بو لایحه نینگ خرجتلری فرقلی اعلان قیلینگن ایدی. باشده معادن و پترولیم وزیرلیگی سرمایه نی تقریباً ۱۰۰ میلیون دالر دیب اعلان قیلگن ایدی. ۲۰۲۵-ییل جنوری آییده، جناب برادر نینگ دفتری بو فابریکه تقریباً ۸ میلیارد افغانی خرجت بیلن قوریلیوتگنی نی ایتگن.
اوشبو لایحه مملکت نینگ جنوبیده اینگ بویوک صنعتی لایحه‌لردن بیری حسابلنه‌دی و توگه لنگندن سۉنگ تقریباً ۵٬۰۰۰ ته مستقیم و غیرمستقیم ایش اورنی یره تیشی کوتیله‌دی. افغانستان صنایع و معادن اتاغی یاقینده بو لایحه اوچ فازده رواجلنتیریلیشی و حاضرده اونینگ ساحه‌سیده تقریباً ۵۰۰ کیشی ایش بیلن تأمینلنگنینی اعلان قیلدی.
بو فابریکه نینگ آچیلیشی افغانستان نینگ اقتصادی اۉزینی اۉزی تأمینلش یۉلیده مهم بیر قدم صیفَتیده بهالنماقده. چونکه بو مملکت ییللر بویی اۉز قوریلیش احتیاجلرینی تأمینلش اوچون قۉشنی مملکتلردن، خصوصاً پاکستان و ایران دن وارداتی سمنتگه باغلیق ایدی. ایچکی ایشلب چیقریش نینگ کینگه‌یشی مملکتده نرخلرنینگ توشیشیگه و قوریلیش صنعتی نینگ رواجلنیشیگه یاردم بېریشی ممکن.
منبع: افغانستان نیوز
🌐
