بیرلشگن ملت‌لر تشکیلاتی نینگ انسان پرورلیک یاردملرینی هم آهنگ قیلووچی دفتری (اوچا) قیش فصلی کیلیشی بیلن افغانستانده تقریباً ۱۵.۹ میلیون کیشی نینگ جدی آذیق-آوقات خوفسیزلیگی یاکه آغیر آچلیک بیلن روپه‌رو بۉلیشیدن خبردار قیلدی. اوچا جمعه کونی، ۸-عقربده، بیر گزارشده مملکت اهالی‌سی نینگ تقریباً اوچدن بیری ییترلی آذیق-آوقاتگه ایگه ایمس لیگینی معلوم قیلدی.
گزارشگه کۉره، قیش آیلریده وضعیت نینگ یمانلشیشی کوتیله‌دی، چونکه بو پیتده اوزاق منطقه‌لرگه باریش قیینلشیب و آذیق-آوقات نرخلری کۉتریله‌دی. اوشبو اداره، بو ییل یاغینچیلیک نینگ یخشی بۉلگنی و زراعتی محصوللرنینگ نسبتاً کۉپه يگنيگه قره‌مسدن، میلیونلب عایله‌لر حلی هم کونده‌لیک ضرور آذیق-آوقاتلرینی ساتیب آلیشگه مالی امکانیتی یۉق لیگینی قۉشیمچه قیلدی.
اوچا شونینگدیک افغانستانده باله‌لرنینگ وضعیتی حقیده چوقور خواطرینی اظهار قیلدی. بو اداره، ۲۰۲۷-ییلگچه افغانستانده آلتی آیلیکدن بیش یاشگچه بۉلگن تۉرت میلیون دن آرتیق باله نینگ آغیر سوءتغذیه نی درمانلشگه محتاج بۉلیشینی پیش‌بینی قیلماقده. اوزاق مدتلی سوءتغذیه باله‌لرنینگ جسمانی و ذهنی رواجلنیشیگه جبرانسیز زیانلر ییتکیزیشی ممکن.
بو گزارشده طالبان تامانیدن عیاللرنینگ تعلیم و ایشلریگه قۉییلگن چیکلاولرنینگ منفی تأثیرلری هم کورسه تیلگن. اوچا، بو چیکلاولرنینگ دوام ایتیشی افغانستان نینگ ۲۰۳۰-ییلگچه عیال متخصص ایشچی کوچیدن جدی کمچیلیککه دوچار بۉلیشیگه سبب بۉلیشینی خبردار قیلدی. مملکت نینگ ۲۰ مینگ عیال اۉقیتوچیسی و بیش مینگ تۉرت یوز عیال صحی خادمی کمچیلیگی بیلن روپه‌رو بۉلیشی تخمین قیلینگن که، بو وضعیت عیاللر و باله‌لرنینگ اساسی خدمت‌لرگه ایریشیشینی جدی شکلده چیکلایدی.
اوچا، قیسقه مدتلی انسان پرورلیک یاردملرنینگ حیاتنی سقلب قالیش اوچون حیاتی ایکنینی، لیکن افغانستانده‌گی تکراری بحرانلر بیلن دواملی کوره شیش اوچون، معیشت، اساسی خدمت‌لر و اقتصادی فرصتلر بۉلیملریده اوزاق مدتلی سرمایه کیریتیش ضرورلیگینی تأکیدله‌دی. بو اداره خلق ارا جامعه‌دن کېله جک قیشده بیر انسان پرورلیک فاجعه‌سینی آلدینی آلیش اوچون اۉز یاردملرینی کۉپه یتیریشنی طلب قیلدی.
منبع: اوچا
🌐
