محلی منبع‌لرنینگ ایتیشیچه، طالبان حکومتی نینگ جنگریلری بدخشان ولایتی نینگ شهربزرگ تومنیده‌گی وندیان قیشلاغی اهالیسیدن قریب ۴۰ کیشینی تۉی مراسمیده موسیقه قۉیگنلیکده عیبلب، حبسگه آلگن. اوشبو واقعه تخمیناً بېش کون آلدین یوز بېرگن.
شنبه کونی، ۹ عقرب، ۸صبح گزېته‌سیگه خبر بېرگن منبع‌لرگه کۉره، طالبان جنگریلری و محلی اهالی اۉرته‌سیده یوز بېرگن تۉقنه شوودن سۉنگ، طالبان ۲۰ کیشینی شهربزرگ تومنیده حبسگه آلگن و باشقه ۲۰ کیشینی ایسه بدخشان مرکزی فیض‌آباد شهریگه آلیب کېتگن. بو تۉقنه شووده طالبان نینگ بیر جنگریسی هم جان بېرگن.
منبع‌لرنینگ قۉشیمچه قیلیشیچه، محلی اهالی نینگ بیر قسمی هم حبسگه آلینیشدن قۉرقیب اویلریدن قاچیب کېتگن و طالبان حاضر هم اولرنی قیدیرماقده. بو وضعیت منطقه اهالیسی اۉرته‌سیده جدی خواطر توغدیرگن.
دیقتگه سزاوار تامانی، اوشبو واقعه محلی اهالی موسیقه بیلن تۉی مراسمینی اۉتکزیش اوچون طالبان نینگ محلی مقام لریدن رخصت آلگنیدن کېین باشلنگن. شونگه قره‌مسدن، طالبان جنگریلری کیینراق مراسمگه باسقین اویوشتیریب، مهمانلرنی حبسگه آلیشگه باشله‌گن.
بو حادثه طالبان حکومتی نینگ سۉنگگی بېش ییل دوامیده افغانستان خلقی نینگ اجتماعی حیاتیگه، خصوصاً موسیقه و ییغینلرگه قره‌ته قۉیگن کېنگ کۉلملی چېکلاولری نینگ بیر بوله‌گی دیر. طالبان هر تورده‌گی موسیقینی عمومي و خصوصی محفللرده منع قیلگن.
بوندن آلدین هم شونگه اۉخشش واقعه‌لر حقیده خبرلر ترقه لگن اېدی. یقین‌ده هراتده‌گی منبع‌لر طالبان نینگ امر بالمعروف و نهی عن المنکر وزیرلیگی محتسبلری خصوصی اویلردن بیریده اۉتکزیله‌یاتگن عیاللر بزمیگه کیریب، «موسیقه آوازی اېشیتیلگنی» سببلی بیر گروه عیاللر و قیزلرنی حبسگه آلیشگه اورینگنینی ایتگن اېدی.
موسیقه نینگ منعه قیلینیشی، حقوق بشر تشکیلاتلری و افغان وطنداشلری تامانیدن کېنگ تنقیدگه اوچره‌گن اجتماعی چېکلاولردن بیری بۉلیب، مملکت نینگ موسیقی صنعتی و صنعتکارلری نینگ حیاتینی سلبی تأثیر آستیگه آلگن.
منبع: ۸صبح
🌐
