افغانستان جمهوریت ریاستی ایشلر اداره‌سی نینگ سابق باشلیغی فضل محمود فضلی، جمهوریت دوریده‌گی رسانه‌لر وضعیتیگه دایر تحلیلیده، اولرنینگ حقیقی مستقل لیگینی سوال آستیگه آلدی. او، رسانه‌لرنینگ مستقل‌لیگی فقط حکومت سانسوری و باسیمیدن آزاد بۉلیش ایمس، بلکه اولرنینگ تشقی تمویللاوچیلرگه مالی و سیاسی باغلیق لیگیگه هم تیگیشلی دیر دیب ایشانه‌دی.
جناب فضلی اۉزی نینگ سۉنگگی یازوویده، جمهوریت دوریده افغانستان نینگ کۉپلب مشهور رسانه‌لری، حکومت کنترولیدن ظاهراً آزاد بۉلیش لریگه قره‌مسدن، مالی بقاسی اوچون تۉلیق تشقی یاردم‌لرگه متکی اېکَنینی ادعا قیلماقده. او «حکومت‌دن آزادلیک» و «تمویللاوچیدن مستقل لیک» ایکی فرقلی مفهوم ایکنینی تأکیدلب، قچان بیر رسانه تشقی مالی حمایه‌گه باغلیق بۉلسه، اونینگ سیاسی و مدیریتی مستقل‌لیگی جدی سوال آستیگه کېلیشینی ایتگن.
فضلی اۉز ادعاسینی اثباتلش اوچون ۲۰۱۹ نچی ییل نینگ نومبر آییده‌گی محبوس‌لر (انس حقانی، حاجی مالی خان و حافظ رشید) نینگ تبادله‌سی واقعه‌سینی مثال قیلیب کېلتیره‌دی. اونینگ ایتیشیچه، اوشبو قرار قبول قیلینگندن سۉنگ و او وقتده‌گی افغانستان حکومتی نینگ جدی تشویش لریگه قره‌می، آمریکا تامانی تۉغریدن-تۉغری مهم خصوصی تلویزیونی و رادیویی شبکه‌لر بیلن تماس قوریب، بو حساس واقعه‌نی رسانه‌لرده یاریتیلیشینی مدیریت قیلگن.
او، بو مدیریت نتیجه‌سیده رسانه‌لر افغانستان حکومتی مخالف بۉلگن بیر قرارگه قرشی کېسکین و تنقیدی بحث‌لردن اۉزینی تارتگنینی قۉشیمچه قیلدی. فضلی نینگ فکریچه، بو ایش تمویللاوچیلرنینگ رسانه‌لر سیاستیگه تأثیری نی کورسه ته‌دی.
ایشلر اداره‌سی نینگ سابق باشلیغی بو منطقنی نادولتی تشکیلاتلر، مدنی فعاللر و سیاسی نهادلرگه هم تعمیم بېره‌دی. اونینگ کۉزقره شیگه کۉره، بیر رسانه یا سیاسی حرکت نینگ حقیقی مستقل‌لیگی نینگ اساسی معیاری، اۉز حکومتی نینگ تنقیدی یانیده، تشقی تمویللاوچیلری و متفق‌لری نینگ سیاست‌لری و اولویت‌لرینی هم تنقید قیلیش حقی و جسارتیگه اېگه بۉلیش دیر.
منبع: فضل محمود فضلی نینگ یازووی
🌐
