د امریکا د فدرالي هوايي چلند ادارې (FAA) په یوه بیانیه کې ویلي، چې یوه لیرجټ ۶۰ ډوله الوتکه له نهو سپرو کسانو سره د فلوریډا په یوه استوګنیزه سیمه کې غورځېدلې او ټول سپاره کسان یې مړه شوي دي. رویټرز خبري اژانس د دوشنبې په سهار، د نومبر پر ۲مه، راپور ورکړی چې دا الوتکه د یکشنبې په ماسپښین په سیمهییز وخت غورځېدلې ده.
د راپور له مخې، امریکایي چارواکو دا هوايي پېښه «یوه وحشتناکه تراژیدي» بللې او ویلي یې دي چې د الوتکې د غورځېدو د لامل په اړه څېړنې روانې دي. د امریکا د فدرالي هوايي چلند ادارې په وینا، دا الوتکه د ټګزاس له اسټین-برګسټروم نړیوال هوايي ډګر څخه الوتې وه او په باهاما کې د «الوترا» شمالي هوايي ډګر ته روانه وه.
دغې ادارې زیاته کړې چې د ترانسپورت د خوندیتوب ملي پلاوی (NTSB) د دې پېښې په اړه څېړنې کوي. تر اوسه د پېښې د قربانیانو د هویت او د غورځېدو د کره لامل په اړه جزئیات نه دي خپاره شوي.
په استوګنیزه سیمه کې د الوتکې غورځېدو په ځمکه کې چا ته زیان نه دی اړولی، خو د ښاري سیمو پر سر د کوچنیو الوتکو د پروازونو د خوندیتوب په اړه یې اندېښنې راپورته کړي دي.
د یادونې وړ ده چې د الوتکو غورځېدل او د مرګونو هوايي پېښو رامنځته کېدل هر کال د نړۍ په بېلابېلو برخو کې د لسګونو کسانو ژوند اخلي. د دا ډول پېښو څېړل معمولا میاشتې وخت نیسي ترڅو تخنیکي، بشري او چاپېریالي لاملونه یې په ډاګه شي.
سرچینه: رویټرز
🌐
