بیرلشگن ملت‌لر تشکیلاتی نینگ مخدر ماده‌لر و جنایتچیلیککه قرشی کوره ش اداره‌سی (UNODC) اۉز ینگی گزارشیده، ۲۰۲۶-ییلده افغانستانده تریاک ساتیشدن حاصل بۉلگن درآمد تقریباً ۵۲۵ میلیون دالرگه یئتگنی‌نی معلوم قیلدی. بو رقم مملکت نینگ زراعت سکتوری قیمتی نینگ ۸.۵ فایزینی تشکیل اېته‌دی.
گزارشگه کۉره، افغانستانده کۉکنار اېکین ساحه‌سی ۲۰۲۶-ییلده ۴۳ مینگ و ۳۰۰ هکتارگه یئتگن، حال بوکه بو رقم ۲۰۲۵-ییلده ۱۰ مینگ و ۲۰۰ هکتار اېدی. بو معلومات بیر ییل ایچیده کۉکنار اېکینی نینگ تۉرت برابردن آرتیق آشگنینی کۉرسته‌دی.
شونینگدېک، تریاک ایشلب چیقاریش هم ۲۹۶ تُن دن ۱۴۶۶ تُن گه کۉتریلگن. گزارشده بو، ۲۰۲۲-ییل اپریل آییده طالبان حکومتی تامانیدن کۉکنار اېکینی و مخدر ماده‌لر ایشلب چیقاریشنی منع قیلگنیدن بویان اېنگ کتّه آرتيش اېکنلیگی تأکیدلنگن.
شو بیلن بیرگه، یونودیسی کۉکنار اېکینی و تریاک ایشلب چیقاریش نینگ حاضرگی سویه‌سی هلی هم ۲۰۲۲-ییلده‌گی منع قیلیش آلدین ثبت اېتیلگن رقملرگه نسبتاً پسراق اېکنلیگینی قید اېتگن. او پیتده افغانستان دنیا نینگ اېنگ ییریک تریاک ایشلب چیقارووچیسی اېدی.
طالبان حکومتی آلدینراق بیرلشگن ملت‌لر تشکیلاتی نینگ افغانستانده‌گی مخدر ماده‌لر توغریسیده‌گی گزارشلرینی رد اېتیب، بو رقملر رسمی معلوماتلر و ساحوی حقیقتلر بیلن مطابقت کېلمسلیگینی ایتگن. طالبان سۉزلاوچیلری هر دایم مخدر ماده‌لرگه قرشی کوره ش بوییچه اۉز تعهدلرینی تأکیدلب کیلگنلر.
منبع: UNODC
🌐
