ملی مقاومت جبهه‌سی نینگ یوکسک مرتبه لی قوماندانلریدن بۉلگن صالح محمد ریگستانی، خواهرزاده‌سی طالبان کوچلری تامانیدن اۉلدیریلگندن سۉنگ، اۉزینینگ ینگی بیر صورتینی هندوکش تاغلریده نشر قیلدی. جناب ریگستانی نینگ خواهرزاده‌سی میرویس خان، بیر مدت آلدین بغلان ولایتی نینگ اندراب ولسوالیسیده اۉلدیریلگن ایدی.
ملی مقاومت جبهه‌سی نینگ سیاسی دفتر رئیسی عبدالله خنجانی، رسانه‌لر بیلن صحبتده بو صورت نینگ سۉنگگی کونلرده آلینگنینی تأییدله‌دی. بو تصویرده، ریگستانی حربی کییمده و دوربین بیلن جهیزلنگن بیر تفنگ بیلن هندوکش قویالری اورته‌سیده کۉرینه‌دی که بو اونینگ افغانستان نینگ تاغلیک منطقه‌لریده حضور و فعالیتی نینگ دوامینی کۉرسته‌دی.
احمدشاه مسعودگه یقین چهره‌لردن و مقاومت نینگ سابقه لی استراتژیستلریدن بۉلگن ریگستانی، بیر نېچه ییللیک تَنَفُس دن سۉنگ ینه ملی مقاومت جبهه‌سیگه قۉشیلدی. اوشبو جبهه نینگ رهبری احمد مسعود، اونینگ حربی تجربه لریگه بناً، جبهه نینگ حربی فعالیتلریگه کۉپراق انسجام بېریش اوچون اونی حربی قرارگاه نینگ عمومی عملیاتی قوماندانی ایتیب تعیینله‌دی.
صالح محمد ریگستانی ۱۹۹۰-ینچی ییللرده احمدشاه مسعود بیلن بیرگه طالبانگه قرشی اوروشگن و ۲۰۰۱-ییلدن سۉنگ پنجشیر خلقی نماینده‌سی صفتیده افغانستان پارلمانیده هم فعالیت قیلگن. او شونینگدیک مملکت ملی قهرمانی احمدشاه مسعود حقیده بیر نېچه کتاب نینگ مؤلفی دیر.
ریگستانی نینگ مقاومت صفلریگه قَیتیب کیلیشی خبری نشر ایتیلگندن سۉنگ، طالبان حکومتی اونی تاپیش اوچون شمالی منطقه‌لرده کینگ کۉلملی عملیاتلر باشله‌دی. عین شو حرکتلر جریانیده، منطقه ده بیر طالبان چرخبآلی هم سقوط قیلدی. طالبان اونینگ سببینی تخنیکی معمالر دیب اعلان قیلدی، اما مقاومت جبهه‌سیگه باغلیق بعضی منبعلر اونی اوریب توشیرگنلیک ادعاسینی اورته‌گه قۉیدی.
طالبانگه تیگیشلی رسانه‌لر یکشنبه کونی، ۲۶ میزان ده، اندرابده میرویس خان نینگ اۉلدیریلگنی خبرینی نشر قیلگن ایدی. مقاومت جبهه‌سیده‌گی بیر ایشانچلی منبع، بو جبهه قوماندانلریدن بیری بۉلگن میرویس خان نینگ صالح محمد ریگستانی نینگ خواهرزاده‌سی ایکنینی تأییدله‌دی. بو واقعه‌دن سۉنگ ریگستانی نینگ ینگی صورتی نینگ نشری، مقاومت نینگ دوامی حقیده‌گی بیر پیام صفتیده تلقی قیلینه‌دی.
منبع: افغانستان اینترنشنال
🌐
