اروپا ده کمیده یېتّی اوچیش و بیر تفریحی کېمه سه‌شنبه کونی بمب قۉییش تهدیدی بیلن یوزلشدی که بو بیر نېچه هوا میدانی فعالیتیده اختلالگه سبب بۉلدی. رویترز خبر اگېنتلیگی نینگ گزارشیگه کۉره، بو تهدیدلرگه قره‌مسدن، کینگ کۉلملی تیکشیرولردن سۉنگ هیچ قنده‌ی پارتلاووچی ماده تاپیلمه‌گن.
بو تهدیدلر پولند، بلغارستان، ایتالیا و اسپانیا مقصدلریگه قره‌تیلگن اوچیشلرنی هدفگه آلگن ایدی. بو واقعه آرتیدن، پولند پایتختی وارسا یقینیده‌گی مودلین هوا میدانی بیر مدتگه یاپیلدی و ایتالیا هوا کوچلری هم دوبلیندن رومگه قره‌ب اوچه‌یاتگن رایان ایر شرکتی نینگ بیر اوچیشینی خوفسیز قۉنگونچه همراهلیک قیلدی.
بلغارستان ترانسپورت وزیرلیگی اعلان قیلدی که میلاندن و دوبلیندن صوفیه‌گه ایکّی اوچیش، تهدید آلگندن سۉنگ، سلامت قۉندی و تیکشیرولر نتیجه سیز بۉلدی. اسپانیاده هم، منچستردن اوچگن باشقه بیر رایان ایر اوچیشی تهدید ایتیلگندن سۉنگ، مورسیا هوا میدانی نینگ بعضی قسمتلری موقت توخته‌تیلدی، اما مقام‌لر کیینچلیک تهدید نینگ یالغان ایکنینی تأییدله‌دیلر.
اوچیشلرگه قۉشیمچه، یونانده اسرائیلگه قره‌ب حرکت قیله‌یاتگن بیر تفریحی کېمه هم مشابه تهدید آلگندن سۉنگ تیکشیریلدی. بو تهدیدلرنینگ هماهنگ ایتیلگن تۉلقینی اروپا ده هوانوردی خوفسیزلیگی باره‌سیده خواطرلرنی آرتیردی.
«اسپری فلایت سولوشنز» هوانوردی خوفسیزلیگی مشوره شرکتی نینگ تحلیل مدیری رایس جونز ایتدی که بیر کونده اوچیشلرگه قرشی یېتّی تأییدلنگن بمب تهدیدی نینگ قید ایتیلیشی بیر استثنایی واقعه دیر. اونینگ ایتشیچه، بو تهدیدلرنینگ احتمالی مقصدی هوانوردی فعالیتلریده کینگ کۉلملی اختلال یره تیش و عمومی قۉرقوو پیدا قیلیش بۉلگن.
«دیامی» هوانوردی خوفسیزلیگی گروهی نینگ رئیسی اریک شوتن، بو واقعه‌لرنینگ روسیه دولتی عامللری فعالیتی بیلن علاقه دار بۉلیشی ممکن لیگینی احتمال بېردی. او بو کبی حرکتلرنینگ اروپا نینگ حیاتی زیربنا‌لرینی اختلالگه سالیش سعی-حرکتلری الگوسی بیلن ماس کیلیشینی استدلال قیلدی. شو بیلن بیرگه، حاضرگچه هیچ کیم یا-ده گروه بو تهدیدلر مسئولیتینی اۉز بوینیگه آلمه‌گن و اروپالی مقام‌لر رسمی روشده هیچ کیمنی عیبلشمه‌گن.
منبع: رویترز
🌐
