طالبان حکومتی نینگ خوست ولایتیده‌گی محلی مسووللری موسیقی چېلیش و ایشیتیش نینگ ۶۵۰ ته اسبابینی آته شگه بیرگنلرینی معلوم قیلدی. طالبان نینگ خوست والیسی سۉزچیسی مستغفر گربز، بوگون (چهارشنبه، ۱۳ عقرب) بیر خبرنامه ترقه تیب بو موضوع نی تصدیقله‌دی و اوشبو اسبابلر بیلن بیرگه، بیر مقدار آته ش بازی موادی هم یۉق قیلینگنینی ایتدی.
جناب گربز نینگ ایتشیچه، بو موسیقی اسبابلری اۉتگن تۉرت آی جریانیده خوست ولایتی نینگ مرکزی و تورلی تومنلریدن طالبان نینگ امر بالمعروف و نهی عن المنکر ریاستی مامورلری تامانیدن ییغیب آلینگن اېدی. او، بو وسیله‌لرنینگ بیر امن و خلوت جایده آته شگه بېریلگنینی قۉشیمچه قیلدی.
بو اقدام، افغانستانده هنر و اۉیین-کولگی نی چېکلش اوچون طالبان حکومتی نینگ کینگ سیاستی نینگ بیر قسمی دیر. طالبان ۲۰۲۱-ییل آگست آییده مملکت اۉستیده قیته‌دن حاکمیتنی قۉلگه کیریتگندن سۉنگ، موسیقی نی «حرام» و «منع» اېتیب اعلان قیلگنلر و اونی یاشلر آره‌سیده «اخلاقی فساد» نینگ عامللریدن بیری دېب بیله‌دیلر. بو فکر باشقه اسلام مملکتلری نینگ اکثریتی نینگ روشیگه قرشی دیر.
طالبان حاکمیتی آستیده، فقط موسیقی سیز شعرلر و اوشبو گروه وصفیده اېتیلگن نعتلرنی اۉقیشگه رخصت بېریلگن. بو گروه نینگ امر بالمعروف محتسبلری افغانستان نینگ بوتون جاییده موسیقی اسبابلرینی ییغیب آلیش و یۉق قیلیش وظیفه‌سیگه اېگه دیرلر. بو سخت گیرلیکلر کۉپ موردلرده خشونت گه سبب بۉلگن.
طالبان کوچلری نینگ خلق نینگ خصوصی مراسم لریگه، خصوصاً توی محفللریگه، موسیقی نی تۉخته تیش اوچون هجوم قیلگنی حقیده کۉپلب گزارشلر ترقه لگن. بو توقنشوولر بعضاً اۉلیملی توقنشوولرگه هم آلېب کیلگن. مثال اوچون، اۉتگن هفته بدخشان ولایتی نینگ شهر بزرگ ولسوالیسیده بیر توی مراسمیده طالبان نینگ مداخله‌سیدن سۉنگ توقنشوو یوز بېرگن، نتیجه‌ده بیر کیشی جان بېریب و باشقه تۉرت کیشی یره لنگن.
بو حادثه‌دن بیر هفته‌دن کۉپراق واقت اۉتگنیگه قره‌مسدن، طالبان مسووللری هلیگچه بو حقده رسمی روشده ایضاح بېرمه‌گنلر. حقوق بشر و فرهنگی نهادلر کۉپ مرته طالبان تامانیدن موسیقی اسبابلری نینگ تخریب ایتیلیشینی قاره لب و اونی افغانستان نینگ فرهنگی هویتیگه هجوم دېب اېتگنلر. بو اقداملر مملکتده هنر و فردی ایرکینلیکلرنینگ سیستماتیک باستریلیشی حقیده‌گی خواطرلرنی آرتیرگن.
منبع: خوستده طالبان والیلیگی دفتری نینگ خبرنامه‌سی
🌐
