طالبان حکومتی نینگ مقام‌لری ایکّینچی مرته بیرلشگن ملت‌لر تشکیلاتی نینگ (COP) کېله جک اقلیم ییغینیده کۉزه تووچی صفتیده قتنه شهدیلر. بو ییغین کېله ر هفته ترکیه نینگ آنتالیا شهریده اۉتکزیلیشی ریجه‌لنگن و طالبان نینگ اوشبو ییغینده حضوری، گرچه کۉزه تووچی صفتیده بۉلسه هم، خلق ارا دقتنی اۉزیگه جلب قیلگن.
طالبان کنترولیده‌گی افغانستان ملی محیط زیستنی سقلش اداره‌سی نینگ اقلیم اۉزگریشلری بۉلیمی رئیسی روح‌الله امین، سه‌شنبه کونی آسوشیتدپرس خبر اگېنتلیگیگه ایتدی که بو گروه نینگ بیر مقامی اوشبو ییغینده شرکت قیلیشنی ریجه لشتیرگن. اسمی فاش ایتیلیشینی ایستمه‌گن بیر ترکیه مقامی هم طالبان هیأتی نینگ کۉزه تووچی صفتیده حضورینی تأییدله‌دی.
بو، طالبان نینگ ۲۰۲۱-ییلده قدرتگه کیلگندن سۉنگ بوندای بیر ییغینده ایکّینچی مرته قتنه شیشی دیر. اولرنینگ بیرینچی حضوری ایکّی ییل آلدین آذربایجان نینگ باکو شهریده‌گی اقلیم ییغینیده بۉلگن. شو بیلن بیرگه، بیرلشگن ملت‌لر تشکیلاتی هنوز طالبان حکومتینی رسمیتده تانیمه‌گن و بو تشکیلات نینگ عمومی مجمع سیده افغانستان نینگ اۉرنی هنوز سابق دولت نماینده‌سی نینگ قۉلیده.
طالبان نینگ عیاللر تعلیم و ایشیگه قۉیگن شدید چیکلاولری بو گروه نینگ خلق ارا سویه‌ده تانیلمسلیگی نینگ اساسی سببلریدن بیری دیر. شو سببلی، اقلیم کنفرانسلری نینگ عضو مملکتلری افغانستان نینگ رسمی نماینده‌لیگی حقیده‌گی قرارنی کیینگه سورگنلر و بو مملکت عملده اساسی مذاکره‌لردن چېتده قالدیریلگن. کۉزه تووچی جایگاهی طالبانگه ییغینلرده حضور بۉلیشگه رخصت بېره‌دی، اما رسمی قرارلر قبول قیلیشده رول اۉینه مَیدی.
افغانستان اقلیم اۉزگریششیگه قرشی جهان نینگ اینگ آسیب‌پذیر مملکتلریدن بیری بۉلیب، قورغاقچیلیک، سوو ییتیبسیزلیگی و ویرانگر سیلاب‌لر کبی کۉپلب بحرانلر بیلن یوزمه یوز دیر. خلق ارا مهاجرت سازمانی گزارشیگه اساساً، ۱۴۰۴-ییل حملدن قوسگچه، مملکت بۉیلب ۱.۶ میلیوندن آرتیق کیشی اقلیم اۉزگریششی نتیجه‌لری سببلی اۉز اوی‌لرینی ترک ایتیشگه مجبور بۉلگن.
طالبان، بو بحرانلر بیلن کوره شیش اوچون افغانستان خلقی اقلیم ییغینلریده نماینده‌گه ایگه بۉلیشی و خلق ارا اقلیمی مالی منبعلرگه ایریشیشی کېره ک دیب استدلال قیله‌دی. بونینگ عکسیده، منتقدلر ایتیشیچه، طالبان بیلن هر قنده‌ی تعامل اولرنینگ حکومتینی رسمیتده تانیش معناسینی بیلدیرمسلیگی کېره ک.
منبع: آسوشیتدپرس
🌐
