بیرلشگن ملتلر تشکیلاتی نینگ تروریزمگه قرشی کوره‌ش بۉییچه باش کاتیبی نینگ اۉرینباسری الکساندر زویف، افغانستانده داعش نینگ خراسان ترماغی اوچووچیسیز طَیّاره‌لر کبی ایلغار حربی تجهیزاتلرگه اېریشگنیدن آگاهلنتیردی. او اوشبو گروه سونی عقلدن فایده‌لنیب، اۉز تبلیغاتینی شانگهای تشکیلاتیگه اعضا دولتلر تیللریگه ترجمه قیلیب ترقه‌ته‌یاتگنینی بیلدیردی.
ملل متحد نینگ اوشبو یوقاری مرتبه‌لی رسمیسی اۉزبېکستان نینگ سمرقند شهریده اۉتکزیلگن «شانگهای پلس» خوفسیزلیک ییغینیده سۉزلر اېکن، اینترنتدن کینگ فایده‌لنیش اورته آسیا مملکتلریده ترورچیلیک خطرلرینی آشیرگنینی قید اېتدی. اونینگ تأکیدلشیچه، خلق‌ارا همجمایت هجوملردن سۉنگ عکس‌العمل کۉرسه‌تیش اۉرنیگه، اولر نینگ آلدینی آلیش اوچون ه Pale حرکت قیلیشی لازم.
زویف اۉزی نینگ تاجیکستان و قزاقستانده‌گی ایش تجربه‌سیگه اشاره قیلیب، ویرتوال فضا‌ده باله‌لر و یاشلر افراطی باسیملرگه کۉپراق مجذوب بۉلیشینی قید اېتدی. او بوندن آلدین هم خوفسیزلیک کینگشیده داعش خراسان ترماغی اۉز صفلرینی قَیته قوریش صلاحیتیگه اېگه‌لیگی و منطقه اوچون جدّی تهدید بۉلیب قالیشینی اېسلاتیب اۉتگن اېدی.
شونینگدېک، اۉزبېکستان دولتی خوفسیزلیک خدمتی باشلیغی باهادیر قربان‌اف مذکور ییغینده تنقیدی چیقیش قیلیب، یالغوز جاری ییلده اۉزبېکستانده افراطی معلوماتلرنی اۉز ایچیگه آلگن ۴۹ میندن آرتیق آن‌لاین منبعلر انیقلنگنینی آیتدی. بو رقم اۉتگن ییلگه نسبتن ۱۴ فایز کۉپه‌یگنینی کۉرسه‌ته‌دی.
سمرقندده‌گی خوفسیزلیک بۉییچه ایلک «شانگهای پلس» دیالوگیده ۲۴ دولت نینگ ۳۳ هیئتی، بېش خلق‌ارا تشکیلات و ۱۸۰ دن آرتیق خوفسیزلیک و استخبارات نماینده‌لری اشتراک اېتدی. اشتراکچیلر ینگی تکنالوژی، سونی عقل و تروریستیک گروهلر نینگ ترماقلردن فایده‌لنیشینی مهار قیلیش بۉییچه فِکر المشدیلر.
خلق‌ارا نهادلر طالبان حکومتی قۉل آستیده‌گی افغانستان توپراغیده قوراللی گروهلر نینگ فعال بۉلیشیدن دواملی خواطر بیلدیریب کېلماقده. بیلرمانلرگه کۉره، داعش خراسان ترماغی نینگ تهدیدلری افغانستان چېگره‌لریدن تشقریگه چیقیب، منطقه اولکه‌لری اوچون اورتاق بیر تشویشگه ایلنگن.
منبع: سمرقندده‌گی شانگهای پلس خوفسیزلیک ییغینی
🌐
