پاکستان خیبر پشتونخوا ایالتی نینگ اعلی وزیری سهیل آفریدی و عمران خان نینگ یوزلب طرفدارلرینی، تحریک انصاف حزبی نینگ مستحکم پایگاهی بولمیش بو ایالتده اضطراري وضعیت اعلان قیلگندن سۉنگ، قولگه آلدی.
فدرال ایچکی ایشلر وزیری نینگ اورینباسری طلال چودری، دوشنبه کونی رویترزگه ایتدی: «هه، مېن اعلی وزیر (سهیل آفریدی) و اونینگ کابینه سی نینگ بعضی اعضالری احتیاطی نظارتگه آلینگنینی تأییدله آلمن.» او بو قولگه آلیشلر یکشنبه کونی عملگه آشیریلگنینی قۉشیمچه قیلدی.
بو اقدام فدرال حکومت نینگ کینگ کولملی مظاهره لر و زوروانلیکلردن کیین شمالی ایالتده اضطراري وضعیت اعلان قیلیب و ایالتی حکومتنی توخته‌تیب قویگندن سونگ عملگه آشیریلدی. بو حرکت ایالتنینگ مستقیم کنترولینی اسلام آبادگه تاپشیریش معناسینی بیلدیره دی.
افغانستان بیلن چېگره داش بولگن خیبر پشتونخوا، سابق باش وزیر و پاکستان تحریک انصاف (PTI) حزبی رهبری عمران خان اوچون اساسی بیر حمایت مرکزی صفتیده تانیله دی. بو قولگه آلیشلر پاکستان فدرال حکومتی و عمران خان حزبی اورته سیده گی سیاسی توقنشوولرنینگ جدی شکلده کوچه یگنینی کورسه ته دی.
بو سیاسی قره مه قرشی لیک عمران خان نینگ ۲۰۲۲ نچی ییلده قدرت دن چیتلشتیریلگنیدن بویان دوام اېتماقده و اونینگ حزبی مملکتده وقتیدن آلدین سیلاو اوتکزیلیشینی طلب قیله دی. بو کینگ قولگه آلیشلر احتمالاً PTI طرفدارلری تامانیدن کوچه یترک عکس العمل گه سبب بولیب و مملکتده گی سیاسی بیقرارلیکنی آرتیریشی ممکن.
طلال چودری شونینگدیک، معین عیبلولر بیلن روپه‌رو بولگن کیشیلر محکمه قیلینه جگینی و احتیاطی نظارتگه آلینگن باشقه کیشیلر آزاد قیلینیشی ممکن لیگینی ایتدی. بو اوزگریشلر منطقه اوچون، خصوصاً افغانستان بیلن چېگره بویلب، مهم امنیتی عاقبتلرگه اېگه بولیب قاله دی.
منبع: رویترز
🌐
