تاجیکستان تشقی ایشلر وزیری سراج‌الدین مهرالدین، هه‌مه‌نی اۉز ایچیگه آلگن ملی معقوللشوو اساسیده افغانستان بحرانی نینگ سیاسی یۉل بیلن یېچیلیشینی سۉره‌دی. او خلق‌ارا همجمعت افغانستانده‌گی وضعیتگه بۉلگن اعتبارینی سۉسایتیرمسلیگی کېره‌ک‌لیگینی تأکیدله‌دی.
معلوماتلرگه کۉره، او بو سۉزلرنی چارشنبه کونی مسکوده بۉلیب اۉتگن دسته‌جمعی خوفسیزلیک شرتنامه‌سی تشکیلاتی نینگ تشقی ایشلر، مدافعه وزیرلری و خوفسیزلیک کینگشی کاتبلری نینگ قۉشمه ییغینیده بیلدیردی.
تاجیکستان تشقی ایشلر وزیری اوشبو اولوغ ییغینده منطقه‌وی و خلق‌ارا همکارلیکلرنی رواجلنتیریش و خوفسیزلیکنی تأمینلش میکانیزملرینی یخشیلاش اۉتا مهم ایکنینی بیان قیلدی.
مهرالدین نینگ قید اېتیشیچه، ینگی خوفسیزلیک خطرلریگه قرشی کوره‌شیش خلق‌ارا همجمعت نینگ بیرلشگن و اویغون حرکت قیلیشینی طلب قیله‌دی.
او شونینگدېک، تاجیکستان افغانستانده برقرارلیک بۉلیشیدن منفعتدار ایکنینی تیلگه آلیب، تینچ بیر افغانستان فقط گینه اورته آسیا خوفسیزلیگی اوچون اساسی شرط ایمس، بلکې منطقه‌ده‌گی ایقتیصادی، ترانزیت و انرژی همکارلیکلری اوچون هم ضروری دیر، ده‌دی.
تاجیکستان تشقی ایشلر وزیری سۉزلری نینگ دوامیده ایتدی: «بیز بوتون مملکت بۉیلب ملی دیالوگ اساسیگه قوریلگن سیاسی و تینچلیک یۉلی بیلن حل بۉلیشنی قۉللب-قوّتله‌یمیز. خلق‌ارا همجمعت افغانستان مسأله‌سیگه اۉز دقتینی کمایتیریشی کېره‌ک ایمس.»
منبع: مسکوده دسته‌جمعی خوفسیزلیک تشکیلاتی ییغینی
🌐
