پاکستان نینگ خیبرپختونخوا ولایتی پولیسی، اوشبو ولایت نینگ کوهات منطقه‌سیده قوراللی توقنشوو عاقبتیده کمیده ۱۰ امنیتی کوچ و ۱۸ قوراللی هجومچی نینگ اولدیریلگنینی معلوم قیلدی.
دان روزنامه‌سی چهارشنبه کیچه‌سی، ۱۲ نوامبر کونی پولیس بیاناتیدن نقل قیلیب، بو توقنشوو خوفسیزلیک کوچلریگه اویوشتیریلگن هجومدن سۉنگ یوز بېرگنینی خبر بېردی.
راپورگه کۉره، پولیس کوچلری آلتیننی ناقانونی قازیب آلووچیلرگه قرشی عملیاتدن قَیته‌یاتگن بیر پیتده قوراللی شخصلر نینگ هجومیگه دوچ کێلگن. ایککی تامان اۉرته‌سیده یوز بېرگن آتیشمه‌ده ۱۸ هجومچی و ۱۰ پولیس منسوبی جان بېردی.
پاکستان پولیسی هجومچیلرنی تحریک طالبان پاکستان اعضالری دیب بیلدیرگن، بو گروه پاکستان حکومتی تامانیدن «فتنة الخوارج» دیب اته‌له‌دی.
پولیس بیاناتیده قید ایتیلیشیچه، توقنشوو نتیجه‌سیده ۱۲ پولیس عسکری یره‌لنگن و تېزده دوالنیش اوچون شفاخانه‌گه یېتکزیلگن.
بو واقعه شونده‌ی بیر پیتده یوز بېرمقده‌که، اۉتگن هفته هم اوشبو ولایت نینگ مهمند تومنیده نامعلوم قوراللیلر تامانیدن اویوشتیریلگن هجومده ایککی پولیس هلاک بۉلیب، بیر نفری یره‌لنگن اېدی.
منبع: دان روزنامه‌سی
🌐
