د تسلا شرکت اجرايي مشر ایلان ماسک د انوېډیا شرکت له مشرتابه څخه د جنسن هوانګ د ګوښه کېدو د راپورونو په غبرګون کې وویل چې د هغه ګومارل به د ده لپاره یو ویاړ وي.
د وال سټریټ ژورنال د راپور له مخې، د انوېډیا اداري پلاوی هوانګ له دندې د لرې کولو لپاره چمتووالی نیسي، ځکه چې د هغه د شخصي اړیکو په اړه ادعاوې مطرح شوې دي. په دغو ادعاوو کې له یوې داسې ښځې سره اړیکه شامله ده چې د چین لپاره پر جاسوسۍ شکمنه ده.
هوانګ تېره یکشنبه د انوېډیا کارکوونکو ته په یوه یادښت کې خپلو تېروتنو ته اشاره وکړه او بشپړ مسوولیت یې پر غاړه واخیست. له دې وروسته اداري پلاوي په دې اړه څېړنې پیل کړې چې ایا هغه د بهرني استخباراتي هدف ګرځېدلی که نه.
د دې پلټنو په ترڅ کې د امریکا د ولسمشر ډونالډ ټرمپ او ایلان ماسک په ګډون یو شمېر مشهورو کسانو د هوانګ ملاتړ کړی دی. ټرمپ هوانګ یو دروند شخص بللی چې د امریکا لپاره یې ډېر خدمتونه کړي دي.
انوېډیا د ایلان ماسک د شرکتونو لپاره د مصنوعي ځیرکتیا د پروسس کوونکو تر ټولو مهمه سرچینه ده. هوانګ په ۱۹۹۳ کال کې دا شرکت جوړ کړ او ارزښت یې شاوخوا ۴ تریلیون ډالرو ته رسولی دی.
د رویټرز د معلوماتو له مخې، د دغو راپورونو له خپرېدو وروسته په مالي بازارونو کې د انوېډیا د اسهامو ارزښت شاوخوا ۸ سلنه راټیټ شو. تر اوسه د انوېډیا چارواکو د هغه د ګوښه کولو وروستۍ پرېکړه په رسمي توګه نه ده تایید کړې.
سرچینه: وال سټریټ ژورنال او رویټرز
🌐
