بیر قطار افغان عیاللری و قیزلری چارشنبه کونی، ۴ قوسده، کانبرا شهریده‌گی استرالیا پارلمانی بناتی آلدیده اۉز هنری اثرلرینی نمایش قیلیب، طالبان حکومتی آستیده‌گی قینچیلیکلر تصوېرینی کۉرگزمه‌گه قۉییشی کوتیلماقده. بو اثرلر افغان خاتین-قیزلری نینگ شخصی تجریبه‌لری و اومیدلرینی عکس اېتتیره‌دی.

استرالیا خلق‌ارا عفو تشکیلاتی جمعه کونی، ۲۹ عقربده بیر بیانات ترقه‌تیب، اوشبو کۉرگزمه «بیز نینگ نظریمیزدن: افغانستان عیاللری و قیزلری نینگ صنعتی» نامی بیلن اۉتکزیلیشینی معلوم قیلدی. بو کۉرگزمه پناهجولرنی حمایه قیلووچی همکار تشکیلاتلر بیلن بیرگه یۉلگه قۉییلگن.

اوشبو اثرلر افغانستان ایچکریسیده طالبان حکومتی نینگ تعلیم، ایش و اجتماعی حیات بۉییچه چکلولریگه دوچ بۉلگن عیاللر و قیزلر تامانیدن یره‌تیلگن. تشکیلاتچیلر نینگ ایتیشیچه، بو کۉرگزمه افغان عیاللریگه اۉز حکایه‌لرینی هنر آرقه لی باین قیلیش امکانیتینی یره‌ته‌دی.

استرالیا خلق‌ارا عفو تشکیلاتی نینگ کمپاینلر مسؤلی ذکی حیدری، بو نمایش استرالیا رهبرلری و خلقینی افغانستانده‌گی عیاللر احوالیدن خبردار قیلیش اوچون مناسب بیر پیت اېکنینی بیلدیردی. اونینگ تأکید قیلیشیچه، چېکلاولرگه قره‌مسدن عیاللر نینگ صداسی اۉچمه‌گن.

حیدری جنابلری استرالیا حکومتی‌دن طالبان حکومتینی بو حرکتلری اوچون جاوبگرلیککه تارتیشینی سۉره‌دی و بو کبی باسیملر جنسیتی تعقیب مصداقی بۉلیشی ممکنلیگینی تیلگه آلدی.

بو کۉرگزمه ۲۵ نوامبر عیاللرگه قرشی زوره‌وانلیکنی یۉق قیلیش خلق‌ارا کونی بیلن بیر پیتده اۉتکزیله‌دی همده کانبرادن سۉنگ سیدنی و ملبورن شهرلریده هم خلققه تقدیم اېتیله‌دی.

منبع: استرالیا خلق‌ارا عفو تشکیلاتی

🌐

Author