سیمه ییزې سرچینې تاییدوي چې د پنجشېر ولایت یو اوسېدونکی د کابل په پلچرخي زندان کې، چې د طالبانو د ډلې تر کنټرول لاندې دی، په مرموز ډول د چاقو په ګوزارونو وژل شوی دی. دا دردونکې پېښه درې ورځې وړاندې د دلوې په ۲مه نېټه رامنځته شوې او وژل شوی کس د منجهور کلي اوسېدونکی و چې تر نیول کېدو مخکې یې په کابل ښار کې ژوند کاوه.
راپورونه ښيي چې د طالبانو تر مدیریت لاندې زندانونه د جدي امنیتي ننګونو او د دقیقې څارنې له نشتوالي سره مخ دي. سره له دې چې په هېواد کې ټولنیزې او امنیتي اندېښنې مخ په زیاتېدو دي، خو دې ډلې تر اوسه د زندانیانو د ځاني امنیت د خوندیتوب لپاره کوم اغېزناک ګام نه دی پورته کړی.
دا لومړی ځل نه دی چې داسې پېښې کیږي؛ ګڼ راپورونه شته چې د طالبانو غړي په قصدي ډول د پنجشېر د اوسېدونکو په نیولو، شکنجه کولو او وژلو لاس پورې کوي. په دې برخه کې د مسوولیت نه منل او د روڼتیا نشتوالی په افغانستان کې د بشري حقونو وضعیت نور هم کړکېچن کړی دی.
#افغانستان #پنجشېر #پلچرخي_زندان #بشري_حقونه #طالبان #کابل #عدالت #مرموز_قتل #زندانیان #امنیت
