د طالبانو دفاع وزارت په ننګرهار او پکتیکا ولایتونو د پاکستان د هوايي بریدونو په غبرګون کې جدي ګواښ کړی دی. د دغه وزارت په اعلامیه کې راغلي چې دا بریدونه د افغانستان د ملي حریم ښکاره سرغړونه ده او ځواکونه به یې په “مناسب وخت” کې د دې تېري غاښ ماتونکی ځواب ورکړي.
دغه وزارت د پاکستان هغه ادعاوې رد کړې چې ګواکې ترهګر یې په نښه کړي، او ټینګار یې کړی چې د دې بریدونو قربانیان ملکي وګړي دي. د سیمه ییزو سرچینو د راپورونو له مخې، په دې بمباریو کې د ښځو او ماشومانو په ګډون لسګونه کسان وژل شوي دي. طالبانو دا کار د پاکستان د پوځ استخباراتي ماتې او د اسلامي ارزښتونو او ګاونډیتوب خلاف عمل بللی دی.
د کابل او اسلام اباد ترمنځ اړیکې په وروستیو میاشتو کې خورا خرابې شوې دي. په داسې حال کې چې پاکستان ادعا کوي بریدونه یې غچ اخیستونکي او د پاکستاني طالبانو (TTP) پر ضد وو، د چارو شنونکي په دې باور دي چې د طالبانو د دفاع وزارت د اعلامیې لهجه محتاطانه ده. خو بیا هم سرحدي ناندرۍ او پر یو بل تورونه دوام لري.
د طالبانو دفاع وزارت د پاکستان بریدونو ته د ځواب ګواښ وکړ
