د اسټرالیا په نیوکاسل ښار کې یوه ځوان موټر چلوونکي خپل موټر د یوه ورزشي ټیم د مینه والو پر ګڼه ګوڼه ور خېژولی او ۱۰ تنه یې ټپیان کړي دي. د ټپیانو له ډلې د یوې پنځه کلنې نجلۍ په ګډون د دوو کسانو روغتیايي وضعیت نازک ښودل شوی دی.
د اسوشیټیډ پریس خبري اژانس د راپور له مخې، دا پېښه د شنبې په سهار، د میزان په ۱۱مه، د سیډني شمال ته په نیوکاسل ښار کې رامنځته شوه. خلک د سړک پر غاړه راټول شوي وو ترڅو د لیګ له وروستۍ لوبې مخکې د "نیوکاسل نایټس" رګبي ټیم بس تشویق او بدرګه کړي.
د نیو ساوت ولز ایالت پولیسو اعلان کړی چې موټر چلوونکی یو ۱۸ کلن ځوان و او له پېښې وروسته نیول شوی دی. پولیسو تر اوسه دا پېښه د ترهګریز عمل په توګه نه ده ډلبندي کړې او په دې اړه څېړنې روانې دي.
په ټپیانو کې یوه پنځه کلنه نجلۍ او یو ۶۷ کلن سړی په نازک حالت کې دي او په روغتون کې تر ځانګړې پاملرنې لاندې دي. اته نور کسان، چې یوه بله پنځه کلنه نجلۍ او یوه دوه کلنه نجلۍ هم په کې شاملې دي، په روغتون کې بستر دي خو روغتیايي وضعیت یې باثباته ښودل شوی دی.
دې پېښې د نیوکاسل په سیمه ییزه ټولنه کې ژور ټکان ورکړی، په ځانګړې توګه چې خلک د یوې خوښۍ وړ ورزشي غونډې لپاره راټول شوي وو. د موټر چلوونکي د انګېزې او د پېښې د کره جزئیاتو د روښانه کولو لپاره څېړنې روانې دي.
سرچینه: اسوشیټیډ پریس
🌐
