د افغانستان د فوټسال ملي لوبډلې د برازیل په کوربه توب په شپږ اړخیزو نړیوالو سیالیو کې خپله لومړۍ لوبه د جاپان له پیاوړې لوبډلې سره له ګول پرته مساوي کړه. دا پایله په یوه معتبره نړیواله سیالۍ کې د افغانستان د فوټسال لپاره یوه مهمه لاسته راوړنه ګڼل کیږي.
دا لوبه چې په ډېرې لېوالتیا سره تعقیبېده، په پای کې صفر د صفر په وړاندې پای ته ورسېده او دواړو لوبډلو په امتیازاتو وېشلو بسنه وکړه. افغان لوبغاړو د یوې منظمې دفاعي لوبې په وړاندې کولو سره وکولای شول د جاپان د لوبډلې بریدونه مهار کړي او خپله دروازه وساتي.
په دغو شپږ اړخیزو سیالیو کې، د افغانستان او جاپان ترڅنګ، د اندونیزیا، پیرو، کیپ ورډ او کوربه برازیل ملي لوبډلې هم حضور لري. دا سیالۍ د افغانستان د فوټسال ملي لوبډلې لپاره یو ښه فرصت دی چې د نړۍ د پیاوړو لوبډلو پر وړاندې ځان وازمويي او راتلونکو سیالیو ته چمتووالی ونیسي.
په ورته وخت کې، د هېواد د فوټسال ملي لوبډلې لوبغاړي به په دې سیالیو کې په خپله دویمه لوبه کې د پیرو له ملي لوبډلې سره مخامخ شي. دا لوبه د دواړو لوبډلو لپاره خورا مهمه ده ځکه چې په دې کې بریا کولی شي بل پړاو ته د تګ لاره هواره کړي.
د افغانستان د فوټسال ملي لوبډلې په وروستیو کلونو کې د پام وړ پرمختګ کړی او توانېدلې ده چې په اسیا کې ځان د یوې مدعي لوبډلې په توګه مطرح کړي. په افغانستان کې د فوټسال مینه وال هیله لري چې دا لوبډله وکولای شي په دې سیالیو کې هم ښې پایلې ترلاسه کړي.
سرچینه: Zarin TV
🌐
