د امریکا فدرالي پولیسو (افبيای) اعلان وکړ چې د بایننس د تبادلې له مرکز څخه غلا شوي له ۱٫۲ میلیارد ډالرو ډېر رمزارز يې ضبط کړي دي. دا پیسې د ډیجیټلي شتمنیو د تاریخ په تر ټولو لویې غلا کې وړل شوې وې.
د افبيای د راپور له مخې، تېره میاشت د بایننس له صرافۍ څخه چې د نړۍ تر ټولو لوی ډیجیټلي صرافي ګڼل کېږي، شاوخوا ۶٫۳ میلیارد ډالره غلا شول. امریکايي چارواکو دا پېښه په شمالي کوریا پورې تړلې یوې هکري ډلې پورې تړلې بللې چې نوم یې «ټریډر ټریټر» (TraderTraitor) دی.
د امریکا د عدلیې وزارت د پنجشنبې په ورځ وویل چې د دولت او خصوصي سکټور په ګډو هڅو تر دې دمه له ۲٫۷ میلیارد ډالرو زیاته مسروقه شتمني منجمد شوې ده. دغه وزارت څرګنده کړه چې اوس يې د محکمې قانوني اجازه ترلاسه کړې ترڅو له دې جملې څخه ۱٫۲ میلیارد ډالره په رسمي ډول ضبط کړي.
د قانوني پروسو له مخې، په داسې حالاتو کې د شتمنیو د بېرته اخیستلو رسمي غوښتنه محکمې ته استول کېږي ترڅو قاضي د یادو پیسو اصلي او قانوني مالکان وټاکي.
افبيای همدارنګه شمالي کوریا د یوې بلې ټولنیزې انجینرۍ طرحې مسؤله وګڼله چې په تېرو ۱۸ میاشتو کې یې له امله ۴۰۰ میلیون ډالره رمزارز غلا شوي دي. دا طرحه چې د «فېس سټیلر» (FaceStealer) په نوم پېژندل کېږي، د پیغام رسولو د پروګرامونو د هک کولو او د جعلي ویډیوګانو (ډیپ فېک) له لارې ترسره شوې ده.
امریکايي چارواکو په وار وار ټینګار کړی چې شمالي کوریا له سایبري غلاوو او ناقانونه ډیجیټلي فعالیتونو څخه د خپلو غیرقانوني وسلو د پروګرام د لګښتونو د پوره کولو لپاره کار اخلي.
سرچینه: افبيای
🌐
