بیرلشگن ملت لر تشکیلاتی نینگ حقوق بشر کینگاشی، ۳۷ مملکت حمایتی بیلن تصویب بولگن بیر قطعنامه ده، طالباندن عیال و قیزلرنینگ اساسی حقوقلرینی پامال قیلووچی بارچه سیاست و اقداملرنی لغو قیلیشنی سۉره دی. بو کینگاش «افغانستانده عیاللرگه قرشی سیستملی تبعیض انسانیت وجدانینی سیلکیتیشی کېره ک» دیب اعلان قیلدی.
بو قطعنامه دوشنبه کونی، ۱۳ نچی میزانده، ژنوده حقوق بشر کینگاشی نینگ آتمیش اوچینچی ییغیلیشیده رای بیریشسیز تصویب بولدی. کینگاش «طالبان تامانیدن افغانستانده گی بارچه عیال و قیزلرنینگ شدید، آرتووچی، کینگ کولملی و سیستملی شکلده باستریلیشی»دن اۉز چوقور خواطرینی اظهار قیلدی و بو وضعیتنی «تحمل قیلیب بولمیدیگن و توجیه قیلیب بولمیدیگن» دیب آته دی.
کینگاش، طالبان نینگ تبعیض، آیریلیش و عیال و قیزلرنی جمعیتدن چیقاریش نظامینی نهادلشتیریش بیلن، اجتماعی فضا نی قورقوو و چیکلاو اساسیده قورگنینی تاکیدله دی. بو تشکیلات طالباندن ییغیلیشلر اېرکینلیگی، تعلیم، ایش و باشقه اساسی حقوقلرگه قوییلگن چیکلاولرنی فوری آلدیریب تشلشنی سۉره دی.
اروپا مملکتلری، کانادا و چیلی کبی ۳۷ مملکت تامانیدن تقدیم اېتیلگن بو قطعنامه، شونینگدېک افغانستان حقوق بشری ایشلری بوییچه مخصوص گزارشچی ریچارد بنت نینگ ماموریتینی ینه بیر ییلگه اوزه‌یتیردی. بو اوزه‌یتیریش جناب بنتگه مملکتده گی حقوق بشر نینگ یامان وضعیتی حقیده نظارت و گزارش بیریشنی دوام اېتیریشگه اجازه بېره دی.
بیرلشگن ملت لر کارشناسلری آلدین طالبان سیاستلرینی تبعیض نینگ «نهادلشتیریلگن» نظامیدن بیر قسم دیب بیلیب و بو سیاستلر «جنسیتی اپارتاید» چارچوبه سیده تیکشیریلیشی ممکن لیگینی ایتگنلر. بو اصطلاح جنسیت اساسیده گی شدید آیریلیش و ظلمگه اشاره قیله دی.
بو قطعنامه نینگ تصویب بولیشی، خلق ارا جنایی محکمه سی تامانیدن طالبان نینگ ایکّی وزیری نینگ توتیش بویروغی آشکار بولیشی بیلن بیر پیتده یوز بیردی که اولر جنسیتی اذیت و آزار سببلی انسانیتکه قرشی جنایت عیبلاوی بیلن تعقیب آستیده دیرلر. بو اۉزگریشلر طالبانگه اۉز سیاستلری اوچون جواب بیریش بوییچه خلق ارا فشارلرنینگ آرتگنینی کورسه ته دی.
منبع: بیرلشگن ملت لر تشکیلاتی نینگ حقوق بشر کینگاشی
🌐
