جنوبی کوریا رسانه لری نینگ معلوماتیگه کۉره، طالبان نینگ بیر حربی هیئتی روسیه ده گی بیر حربی تمرین جریانیده شمالی کوریالیک بیر حربی مقام بیلن اوچره شیب، حربی همکارلیکلر حقیده صحبت قیلگن. بو ایکّی تامان حربی مقام لری آره سیده گی مستقیم تماس نینگ بیرینچی گزارش بیریلگن موردی دیر.
جنوبی کوریا نینگ یونهاپ خبر آژانسی، بو اوچره شوو طالبان اردوسی نینگ بیر قوماندانی نصیب الله مدنی و شمالی کوریا نینگ مسکوده گی حربی وابسته سی رو کی چول آره سیده یوز بیرگنینی گزارش بیردی. ایتیلیشیچه، ایکّی تامان حربی تعلیم و تجربه لر الماسیشی حقیده صحبت قیلگنلر. طالبان نینگ مدافعه وزیرلیگی هم بیر عکس نشر قیلیش بیلن بو اوچره شوونی تایید قیلگن.
مشترک حربی تعلیم لر مرکزی نینگ قوماندانی مولوی نصیب الله مدنی رهبرلیگیده گی طالبان هیئتی، روسیه نینگ دعوتی بیلن «سنتر ۲۰۲۶» کۉپ ملیتلی حربی تمرینیده قتنشیش اوچون اوشبو مملکتگه سفر قیلگن اېدی. بو حربی تمرین ۱۴۰۵ نچی ییل میزان آیی نینگ ۶ دن ۱۱ نچی کونگچه روسیه نینگ تورلی منطقه لریده اۉتکزیلدی.
طالبان مدافعه وزیرلیگی، اوشبو گروه نینگ هیئتی حربی تمرین جریانیده شمالی کوریا، چین، هند، ویتنام، کلمبیا، اۉزبېکستان و تاجیکستان کبی بیر قطار مملکتلرنینگ حربی نماینده لری بیلن اوچرشگنینی تاییدله گن. اوشبو وزیرلیککه کۉره، بو اوچره شوولرده «ایکی تامانلمه علاقه لر، حربی تجربه لر الماسیشی و تخصصی تعلیم لر» حقیده بحث بولگن.
بو تماس طالبان و شمالی کوریا نینگ رسمی دیپلوماتیک علاقه لری بولمگن و پیونگ یانگ نینگ هم طالبان حکومتینی تانیمگن بیر پیتده یوز بیرماقده. بو اوچره شوو، طالبان نینگ اۉز تشقی علاقه لرینی کینگه‌یتیریشگه بولگن حرکتلرینی، خصوصاً روسیه بیلن یقین علاقه لرگه اېگه مملکتلر بیلن، کورسه ته دی.
بو حادثه، روسیه نینگ طالبان و شمالی کوریا بیلن علاقه لرینی کینگه‌یتیریشی زمینه سیده تحلیل قیلینیشی ممکن. مسکو طالبان حکومتینی تانیمیش بیلن بیرگه، اوکراین اوروشیدن سۉنگ پیونگ یانگ بیلن اۉز حربی و امنیتی علاقه لرینی جدی شکلده کوچه یتیرگن. ۱۴۰۳ نچی ییل جوزا آییده ولادیمیر پوتین و کیم جونگ اون آره سیده «جامع استراتیژیک شریکلیک» پیمانی نینگ امضالنیشی بو همکارلیکلرنینگ اوجی اېدی.
منبع: یونهاپ خبر آژانسی
🌐
